今次要介紹喺樂富廣場2樓UNY生活創庫入面美食廣場嘅一間台灣菜小店叫「小巨蛋」，呢度美食廣場座位唔係好適合輪椅人士坐，完全無一張枱可以搬走張凳，商場管理層請注意呢一點，如果要我出馬嘅話，你哋會流最少100公升眼淚！
講返呢間「小巨蛋」全日套餐都只係$50起，送埋飲品添，仲可以加錢加小食同冰粉，呢度主要係做附近學校街坊生意，無論價錢食物質素性價比都好高！
1.香辣冬菇雞粒泡飯+道地柑桔檸檬茶$55+春卷仔$8（9.5/10）
呢碗香辣冬菇雞粒泡飯真係有驚喜，小辣得嚟都辣得幾過癮，入面冬菇粒同雞肉都好多，呢個套餐送埋飲品，揀咗罐裝道地柑桔檸檬茶，我再加多個春卷仔小食，呢個春捲炸得好脆，入面係素菜，素菜餡料唔算太多！
2.小巨蛋肉燥飯+道地鴨屎香檸檬茶$50+大雞扒$18（10/10）
呢碗小巨蛋肉燥飯個米飯用咗靚嘅米，$50唔會將貨就價，肉燥飯入面有甘筍、流心蛋、酸菜、肉燥、冬菇粒等等，酸菜酸酸辣辣，呢個套餐送埋飲品，揀咗罐裝道地鴨屎香檸檬茶，我再加多個大雞扒小食，大雞扒比食客之前已經剪開咗4大塊，呢個雞扒非常香脆同juicy，就算放喺最後食都依然好脆，必加呢個小食之選！
3.台式冰粉$8（10/10）
呢個冰粉大大舊，夏天食簡直係降溫恩物，入面仲有提子乾同山楂粒，非常正！
2人總共價錢$139
個人口味總評分：9.83/10
地址：樂富聯合道198號樂富廣場2樓UNY生活創庫美食廣場LF-03號舖
