昌哥粵菜館

营业中

休息中

已經聽聞呢一間粵菜館專做傳統懷舊粵菜好耐，而且師傅手藝非常高，今晚終於有機會試得到，食物質素同埋侍應嘅服務都非常好，雖然我哋只係家庭式小聚，叫咗幾個簡單嘅餸菜，不過樣樣都高水準。當中最好食就要算呢個子薑菠蘿咕嚕肉，首先最精彩係個咕嚕肉嘅汁，真係用山楂去做，嗰種果味係其他用醋溝嘅汁永遠取代唔到。子薑嘅哋亦同山楂汁同菠蘿仲有咕嚕肉都好夾，好好食。另一個好好食嘅就係要預訂嘅腿蓉鷓鴣羹，食落啖啖鷓鴣嘅鮮味，無得頂。呢度連涼瓜炒蛋都做得好食，蛋炒得好滑。侍應介紹我哋試吓老少平安，呢個都做得好，魚肉同埋豆腐嘅份量好平衡，有魚味又有豆腐味，個芡汁薄薄一層都做得幾好，唔會太稀唔會太杰。最後呢個皮蛋子薑都係侍應介紹，皮蛋同子薑都靚，皮蛋係溏心皮蛋，子薑真係冇根，美味的配合。