賢記清湯牛腩

营业中

休息中

今日去咗元朗搵地方住，周圍逛之下見到有間「賢記清湯腩」，立即令我諗起大埔已經結業嘅「群記清湯腩」，兩間相信應該必定冇關係，只係個名有啲似。就入去試吓，碌完個餐牌之後又冇食清湯腩，只係叫咗個淨牛雜加樽薏米水。我咁大個人都係第一次食清湯牛雜，牛雜有肺腸膀雙肚（可惜冇竹腸同粉腸冇粉），都做得好好夠冧、入味、乾淨，但係最驚訝嘅居然係佢碗湯，初初見個餐牌上面淨湯收 S20 覺得有啲過份，飲完覺得佢可以買 $30，非常美味，食咗一半之後加咗少少醋同埋辣椒油，個湯又變成另一種飲法。睇隔離左近啲食評話佢服務唔好，加上頭先親身嘅體驗，佢嘅服務唔講得上係唔好同中環九記係冇得比，餐廳位阿妹係好典型嘅千禧後新一代，心直口快串人唔使本嗰一種，但就唔係白鴿眼睇人唔起或者嫌你麻煩，因為食食吓有個明顯係生客又自稱唔識中文嘅講中文女人嚟買牛丸，又要咁又要咁之下，仍然繼續做生意，到我找數嘅時候問佢附近嘅環境，佢亦都笑笑口解答，但係三分鐘之前佢仲同廚房炒鑊勁 😁相信我會再返嚟試埋佢其他嘅產品，希望清湯腩、牛丸、豬肉丸唔會令我失望。