牛魔王餐
餐廳有唔同嘅套餐選擇，包括：咩都有得食，食材最豐富嘅至尊餐、主打肥牛同和牛嘅牛魔王餐、任食鮮蝦同深海龍蠆嘅海鮮餐等！今日我哋就揀咗牛魔王餐，套餐除咗本地手切牛頸脊之外，仲有任食嘅美國SRF黑毛和牛肉眼、安格斯肩胛肥牛、安格斯牛小排、美國肥牛同其他打邊爐配料。
湯底
打邊爐最重要就梗係湯底，湯底有澳門豬骨湯底、椰青花膠蟲草花湯底、藥膳醉雞湯底、新鮮蟹窩花甲湯底同四川麻辣湯底。但貪心嘅我哋就叫咗四式火鍋湯底，有齊皮蛋芫茜湯、麻辣、沙嗲同蕃茄湯底。
自取區
喺等緊上菜嘅時候，可以去到自助區領取冷盤小食，例如泡菜、鳳爪同螺肉。
流浮山生蠔
生蠔除咗廣島蠔、美國蠔、法國同澳洲生蠔之外，其實仲有Made in Hong Kong嘅流浮山生蠔！近期係流浮山生蠔嘅當造季節，所以我哋都upgrade咗，叫埋任食流浮山生蠔啦！上枱見到啲流浮山生蠔，真係好驚喜，隻隻都半隻手掌咁大，超肥美，而且用冰墊起，以確保新鮮。蠔身豐滿，漲卜卜，食嘅時候，味道鮮甜，勁多肉汁，好好味！
本地手切牛頸脊、美國SRF黑毛和牛肉眼、安格斯肩胛肥牛、安格斯牛小排、美國肥牛
第一轉上枱嘅時候，所有肉會一次過奉上，除咗本地手切牛頸脊之外，其他都係任叫任食。本地手切牛頸脊色質紅潤，雖然脂肪少，但勝在肉味超濃；美國SRF黑毛和牛肉眼嘅油花分佈平均，完全無筋，所以食嘅時候軟腍，接近入口即熔；安格斯肩胛肥牛唔會太油膩，肉汁juicy，肉味濃香。所以美國SRF黑毛和牛肉眼同安格斯肩胛肥牛都係encore之選。
任食火鍋配料
除咗蔬菜自取任食之外，新南苑私房菜火鍋鷄煲仲提供超過40款嘅任食火鍋配料，可以任點任食：灌湯小籠包、豚肉、雞件、響鈴、鮮蝦雲吞、魚皮餃、韮菜餃、丸類、讚岐烏冬、出前一丁等等。
