以前座落長沙灣嘅傳統潮州酒樓，搬去觀塘間唔中都會食下，晚市有二人、四人、八人套餐，適合唔同人數歡樂暢聚
今次同朋友一齊食4位用套餐＄808（另有小菜，茶芥，加一），坐得舒適，無限時限刻，又無一般酒樓咁嘈，同朋友坐定定傾計好FIT👍🏻
不愧係傳統潮州酒樓，一坐低就先送上功夫茶，嘆一嘆呢個唯一以飲茶習俗而列入嘅“國家級非物質文化遺產名錄”🍵
🪿 鹵水鵝肉拼盤
材料有豆腐、雞蛋、紅腸、豬腩肉，當然仲有主角鵝肉啦！
每一樣都好入味，又唔會死鹹，特別鐘意豆腐，豆香之餘索哂汁，好味！
鵝片無骨，肉質好嚼唔韌，皮同膏薄薄一層幾易入口，不過說不上好甘香，雖然好似好招牌但感覺普通
🐖 鹹菜胡椒豬肚湯
今餐MVP！鹹菜夠味無死鹹，胡椒存在感有但唔會辣到好俗喉嚨，味道到位又口感幾清澈
豬肚洗得好乾淨，無怪味，食落就係好食嘅豬肚，肉質柔軟，唔會嚼到香口膠咁，大家爭住飲！
🐟 清蒸沙巴龍躉
火候控制恰到好處，魚肉滑溜，唔會嚡烚烚
蒸魚豉油好味，簡直想叫碗白飯送😆
🦪 家鄉蠔烙
唔係一般煲仔飯大排檔嘅卜卜脆蠔餅，質感更加似蚵仔煎
個粉餅軟腍，油膩，蠔味普通，下次應該會叫其他菜式
🦐 椒醬肉炒蝦仁
好惹味！甜甜辣辣咁！
成兜野最多就係菜脯同豆腐乾，值唔值見仁見智但幾好味就真嘅
蝦仁細細粒，味道鮮美，但只有4,5粒左右
🍜 鮑汁瑤柱炆伊麵
材料有菇絲，紅蘿蔔，芽菜，蔥，牌面上睇都幾齋
鮑汁味道不太突出，伊麵煙韌尚算入味，整體普通
整體份量好足夠，水準就有點飄忽，好食嘅幾好食，偶有失手都算係普通，未跌到落難食個level
呢晚侍應姐姐服務態度不錯，同我地呢枱有講有笑，仲講下呢間酒樓嘅歷史添！
1
