1
🦀 金沙蟹（鹹蛋黃炒蟹）
少數地方能夠點到嘅美食，餐牌見到眼前一亮，即點嚟試下。肉蟹大隻厚肉嫩滑，鹹蛋黃炒得香口又入味，而且係流質，唔係一舊舊，考大廚功力。喜出望外，絕對推薦，值得一試，嚟緊會再encore.
🦪 粉絲蒜蓉蒸扇貝
自己一直鍾意食嘅菜色，所以會點。味道唔錯，唔多油，粉絲面去到淋，略嫌棄少硬，可以再蒸耐啲。唯一問題係扇貝脫落時並未有一嚿細嘅肉黐住喺塊殼度。
🫛 豆豉鯪魚炒四季豆
四季豆都係我鍾意食嘅菜色。而呢碟四季豆材料非常足，超多豆豉鯪魚。我已經盡量夾多啲豆豉鯪魚但仍然去到尾聲時都仲有好多。四季豆炒得夠香又惹味，完全唔慳料。
🐟 椒鹽白飯魚
一般大排檔都有椒鹽九肚魚，但白飯魚就唔係度度有。椒鹽味未夠重，但勝在炸得脆同薄。
🪿 豉油皇鵝腸
份量十足，味道濃郁。鵝腸爽滑。
💰 埋單大約 $650，兩人食到好滿足。隔離枱亦有20人幫襯。唔多遊客，大部分街坊生意。好過有次去港島區熟食檔食咗八百幾蚊仲要唔飽唔好食。金沙炒蟹已經值回票價。
