呢間新式點心專門店, 環境乾淨企理, 坐得舒服, 最重要係 —— 冇加一! 成張單實價實收~~
價錢方面都相宜合理, 全部點心都係廿幾三十蚊一籠, 食材唔馬虎, 味道同賣相都見心思
服務方面要讚, 職員勤快, 態度亦都唔錯~ 成個體驗好滿意!!
呢度唔單止有傳統點心, 仲有好多新派特色點心,例如斑蘭叉燒包、百花釀魚肚等....
午市同晚市仲有小菜套餐添:)
1
斑蘭焗叉燒包 $26
即叩即焗熱辣辣!! 斑蘭外皮焗到表面酥脆組織裂開, 好似菠蘿包咁嘅效果, 帶淡淡斑蘭香~~
再配埋甜而唔膩嘅叉燒餡, 瘦肥適中, 肉汁融喺麵皮入面
百花釀魚肚 $31
魚肚經過處理, 釀咗足料蝦膠~
魚肚口感軟腍, 吸收晒湯汁既精華
蝦膠爽彈, 配埋脆脆既蟹籽, 口感豐富!!
鮮蝦腐皮卷 $27
金黃腐皮炸到香脆, 就算放咗一陣都唔會腍晒~
入面啲蝦肉大粒爽口, 咬落去「噗噗聲」, 仲有少少芫茜馬蹄混合, 增加咗層次
芥蘭炒牛肉 $88
套餐包老火湯(粉葛豬骨湯) & 砵仔飯~
芥蘭炒得翠綠爽脆~ 牛肉片滑而唔鞋口, 整體清爽, 有鑊氣, 加少少蒜頭同蠔油吊味, 係好實惠嘅家常小炒
老火湯粉葛煲到粉糯, 甜味滲晒落湯入面~ 豬骨出晒骨香, 飲落去清清地又有一陣自然甜味, 完全冇味精又唔油膩, 係好標準嘅老火湯!!
成碗湯飲完有一種好舒服嘅暖感
砵仔飯上枱熱辣辣, 開蓋即刻聞到陣陣米香
白灼生菜 +$10
清清地嘅白灼生菜, 淋上一層豉油~ 生菜保持翠綠, 入口爽脆多汁
簡單但真係好清甜解膩, 配搭前面嘅炸煎餸菜, 啱啱好中和返
