黃金聖鬪士的日常，守護聖域保護雅典娜，香港人加油﹗師傅有料到，日日餐單唔同款。龍門焗飯焗意、芝士咖哩、芝士黑椒、芝士茄汁味道都滿意，雞牛豬厚厚大件兼水潤，那裡唔好食呢？最緊要正字，捍衛繁體字！餐牌雞髀或雞肶，唔係脾呀！龍門都養好多姐姐嬸嬸喎，眼見已經四個廚房四個樓面咯。熱檸茶走甜，深啡色濃濃茶味，泛著檸檬酸澀味提神良方，長長幼幼的木條有點難用，不過非常環保。
煎蛋秘製滷水雞髀飯，探訪多次終於都食得到，堅持不懈香港人加油！賣相擺盤有誠意。硬實乾涸沒肉甜的雞髀，雞皮都是乾乾的，預料之中合格正常唔難食，滷水汁調得平淡偏水偏淡。太陽蛋面冷底暖，微溫飯太濕少少爛，唔夠熱唔夠香，就算撈埋淡豉油都係十分平庸。
鮮茄汁焗豬扒飯，即焗有誠意，熱烘烘的到來，摸一摸堅燙手喎！索一索鮮茄味突出，還有陣陣肉香芝士香添。耐心將炒飯及鮮茄汁撈得均勻完美才慢慢嘆，溶岩般的鮮茄汁，高溫燙親我的櫻桃小嘴啊！越熱越好食。清淡的味道包著嚥韌沒蛋香的炒飯嘴嚼，平凡而單調。豬扒醃味溫和，食得到的豬肉甜味，而且有咬口夠天然，咬啖豬扒配啖飯多多汁夾雜芝士咸香，算合格可以的，真心大快活會好食多倍。
芝士黑椒汁焗雞扒飯，處女座必殺天舞寶輪黑椒汁焗雞扒，光芒四射熱力迫人，火氣十足吱吱咋咋滾住登場，已被芝士黑椒香氣小宇宙所籠罩，立即兜得均勻預備起動！厚厚雞扒肥美彈滑，雞皮凰脂，白肉雞汁，大大舊伴飯釀入嘴仔，香香濃濃厚厚黏黏黑椒汁有點咸，撈多一點飯拼雞扒嫩肉剛剛好！
咖哩焗魚柳飯，思前想後焗飯焗意焗飯焗意，都係覺得咖哩撈飯較為吸引！即焗需時要耐心等候，其實都不用十分鐘已經熱騰騰送上，香氣撲鼻咖哩芬芳無比！檢查一下，有無搞錯呀！塊魚柳仲要大塊過厚過件雞扒，咁樣我會好飽架喎﹗切舊大大厚厚連咖哩撈飯塞入口，真的要擘到盡先釀得到呢！塞到嘴仔脹卜卜滿足非常，脆脆的炸粉吸盡咖哩汁，炒飯底亦吸盡大量咖哩汁濕濕品嚐，味濃辛辣又帶甜，滑彈的魚柳不過仍然食得到一絲魚青味道！咖哩芝士非常夾，咖哩有蔬菜甜味？似甘筍的清甜，大大舊魚大大啖飯多多的汁，燙著嘴細味，幸福美滿！
茄汁焗肉醬意粉，姐姐突然問焗肉醬意粉要咩汁？我呆左兩秒，肉醬意粉唔係理應茄汁架咩？先入為主，我住係自己個框框裡面太耐咯，仲可以揀黑椒、咖哩，芝士呢。有點稀有點水掛不起肉醬，熱辣辣勁滑意粉，清淡茄汁撈芝士，啜過不停迅間消滅，最後剩低大量茄汁肉醬係底，可以一羹一羹地品嚐！
焗黑椒汁牛扒意粉，吱吱渣渣鬼殺咁嘈到場，芝士黑椒氣味輕飄，我已被完全俘虜！厚厚巨形港式牛扒，醃得入味微𢲡不過份，滑滑帶彈性，清甜牛味食得開心舒服。甜美微辣黑椒油混著咸香芝士，意粉捲作一團擘大口塞入嘴仔大滿足！
芝士汁焗魚柳意粉，芝士汁真係有點淡口，比忌廉湯更淡味。炸魚柳非常出色，魚味濃郁，外層香甜，肉質鬆軟。淡淡芝士汁捲著香口魚柳大大啖塞入，添點味道可口得多，燙著嘴品嚐更加美味！
