豉椒豆卜蒸排骨飯炒底，排骨爽彈肉多骨少真靚靚，啖啖爽肉搭脆卜卜軟骨趙得舒暢﹗豆卜索盡豉汁略咸，再加上濃烈豉椒蒸排骨，迫住扒多幾啖雪白濕炒飯。涼瓜炒蛋飯炒底，甘甘帶爽涼瓜片不苦澀，炒蛋黏黏漿糊，漿住我的嘴﹗白雪雪炒飯底濕濕腍腍黐晒牙，炒得最差的一次，而且誠意地千里送條毛作裝飾呢。
乾燒伊麵，雖乾爽彈彈完整不散碎，最慘無乜色水而落味淡口不夠香不夠味，淡淡然悶悶的。四川麻婆豆腐，花椒味辣汁浸著肉鬆十分惹味，可憐的豆腐不軟滑不夠熱辣辣，而且隱約有點點酸味。四川麻婆豆腐撈乾燒伊麵，無心插柳但柳成蔭﹗濃味香辣麻婆汁遇上淡口伊麵互補長短互相扶持，味道齊齊提升到另一層次﹗長啜長有的伊麵拖著麻婆汁夾著肉鬆豆腐，大啖大啖越塞塞起敬，百味交差融合舔舔脷﹗最終一滴不留清得乾乾淨淨。
金針雲耳蒸雞，濃郁醃味陣陣酒香，雞件雞肉索晒味，就連蟲草花雲耳撈飯都一樣滋味無窮﹗大量雞件重料夠抵食，髀滑胸鞋。XO 醬瑤柱蛋白炒飯，第一次食用豉油炒的瑤柱蛋白炒飯，我較喜歡菜粒多過脆肉瓜粒。有鑊氣熱騰騰，蛋白一塊塊，瑤柱彷如大海撈針真係睇極到睇唔到，幸好豉油味撞XO 醬味道蠻可口。金針雲耳蒸雞配XO 醬瑤柱蛋白炒飯，嘗試將兩者融合會否讓味道提升一丁點，最後結果係失敗，平平凡凡沒特別。
粟米魚柳飯炒底，炒飯較香口搭略咸魚柳微暖，飯焦黐牙，整體滿意。職員聲稱最多 20 分鐘有得食，居然吹風吹足 45 分鐘，我都唔想黑臉，實在太耐喇麻？重新煲一煲白飯都煲好了。梅菜蒸肉餅，甜味濃濃的梅菜一篤仔置中，腍腍鬆散肉餅勁多肥豬肉，食完條脷立立令﹗有肉汁有菜甜，大大啖肉大大啖飯剛剛唔難食。
魚香茄子炆伊麵，麵底夠大份見到使我老懷安慰怕餓親﹗茄子爽爽不硬帶汁，肉鬆多多游走在伊麵之間，狠狠地大力吸啜，每口都能掛點嚥韌肉鬆，提鮮提味。伊麵炒得彈彈乾爽完整，還保留到原始蛋香。師傅手藝合格，略厭味道偏淡，加點生抽老抽會更加可口吸引色彩繽紛。
蟲草花土魷蒸肉餅，厚厚肉餅噴出甘香油脂，土魷海味咸鮮香噴噴極醒胃，肉彈鬆化滑嘟嘟，大啖肉大啖飯天寒地凍要食飽一點保暖保暖﹗西芹雞柳飯炒底，西芹雖爽但不夠嫩不夠清甜，而雞碎淡如水沒什麼味道，撈埋清淡炒飯都係十分清淡。蟲草花土魷蒸肉餅西芹雞柳飯炒底，炒飯底再次都係食到我滿口飯焦兼黐牙﹗淡如水的西芹雞柳跟土魷蒸肉餅合體，配上炒飯即時美味百倍，忍不住瘋狂扒飯啊﹗
九層塔三杯滑雞，雞件出自上庄，雞胸雞翼雞背脊雞膊頭﹗炸得乾鞋沒半點肉汁骨杉杉，熱食味道還可以，放涼太咸吃不消，使我有放棄投降的念頭﹗最好味竟是粉甜蒜子，挑出全部配炒飯大口大口地享受。滑雞？滑雞在那裡，在幻想中？
咖哩牛腩飯炒底，估不到咖哩汁比炒飯還要多，全部倒下太衝動，最後幾啖飯像飲咖哩汁一樣﹗炒飯有質素有鑊氣熱烘烘，落味得宜香噴噴飽滿彈牙﹗大量香而不辣幼滑咖哩汁伴著一口牛腩，鬆軟肉質跟炒飯不停灌入細味，露出滿意的笑容﹗
魚香茄子，陣陣咸魚香混在肉鬆間掛在軟綿茄子上大大啖進入，舌尖震動味道強烈，佔據每顆味蕾，讓炒飯搭配更可口惹味﹗枝竹牛腩飯炒底，微羶鬆化的牛腩由厚厚芡汁緊緊包著，墊在豆香枝竹上鋪在香噴噴炒飯頂狠狠地嘴嚼，各種味道交錯打滾變得更加美妙，夾得天醫無縫﹗
蒜子豆腐魚柳，魚柳大大碌滑嘟嘟，外層吸盡濃郁甜醬油，裡面鬆軟有魚味不腥不嗅，拼上靚靚鑊氣炒飯夠晒絕，還有辛甜粉口蒜子也助功不少。豆腐就較為平庸，香口的外皮，結實水潤微溫內心，合格。福建炒飯，無味滑雞粒，無味爽蝦仁，淡味草菇，脆脆肉瓜，少少瑤柱絲，共冶一爐﹗我喜歡芥蘭莖葉粒的甘甜爽感，整體濕濕滑滑香香熱熱，味道豐富搭著芡汁可以一試。
豆腐火腩飯炒底，鑊氣迫人炒飯底，香噴噴油香蛋香加埋飯粒乾爽嚥韌，搭埋肥美燒肉䕄水蛋大滿足，火腩半肥瘦不過咸不嗆喉，咸鮮拼爽肥肉爽炸皮仲有彈性充沛靚瘦肉，高質演繹﹗大大粒水豆腐一啖一粒配炒飯，外香內水潤，最衰有點酸味要扣點分數。
瑤柱肉碎蒸水蛋，我要走蔥架﹗蛋香飄逸，生氣勃勃，界出厚厚大大舊水蛋躺在炒飯，擘盡口一塞﹗蛋汁肉汁甜豉油夾雜瑤柱鮮跟舌頭打滾，閃閃發光。兒時最愛媽咪無豉油的蒸水蛋，直接整碗飯倒落碟蒸蛋獨佔美食，暢快無比﹗
眉豆湯，真材實料濃郁清甜的湯水。黑椒汁美式雜扒，嬸嬸忘記落黑椒汁，請再稍等 1 分鐘另上，酸酸甜甜微弱香辣。只得半塊薄雞扒，仲要係怪味雞扒，油肥雞皮，硬實白肉。有骨豬扒肉味香濃，醃味得宜煎得金黃鬆化。腸仔結實皮香肉甜，輕燙火腿沒特別。火腿腸仔雞扒豬扒，無煎蛋有點失望。
芝士焗鮮茄醬豬扒飯，即焗新鮮出爐香噴噴熱烘烘﹗鮮紅撞淡黃畫面吸引奪目，擺盤滿瀉夠壯觀。堅勁多芝士，但我諗起北海道納豆飯，雖然茶記格局及衛生惡劣，不過出品蠻可以﹗有幾粒鮮茄粒及一界茄角，咬啖試試嚇一嚇﹗竟是凍凍硬硬生番茄，放棄。茄汁酸度高夠濃味撈飯醒胃，炒飯只有零星蛋碎無蛋香無蛋味，微脆薄豬扒滑嘟嘟醃味香濃，少少飯大大啖肉一流。
南北杏西洋菜湯，高溫滾燙熱辣辣，濃郁菜甜味，厚厚實實好飲好飲。招牌海南雞配香茅雞油飯，油飯有飯焦喎﹗陣陣茅香乾爽質地不過濕不油油膩。招牌海南雞，薑蓉拼酸汁，識食更係撈晒兩款汁，醒胃惹味撈飯一流﹗嫩雞半肥瘦，雞皮滑滑藏著膠原蛋白啫喱，髀肉濕嫩，胸肉嚥韌。
1
