泰簡

营业中

休息中

香港唯一一間緬甸菜！我自己本身係好鐘意東南亞菜式嘅人。對我嚟講呢次係試新嘢又係喺comfort zone裏面，因為感覺上都係好啱華人口味。✨緬甸魚湯粉 $108湯底係濃濃魚味同埋香料味，鮮得嚟完全唔腥。食到尾好多發現好多沉底嘅魚肉碎，越食越好味。我直情飲晒成個湯，無味精超級正。✨茶葉豆炒飯 $90唔講唔知緬甸係少數會用茶葉煮食嘅國家，而茶葉豆炒飯係佢哋好出名嘅菜式。味道又鹹又酸，亦帶點辣味，非常開胃。其實緬甸嘅茶葉豆炒飯係拌飯而唔係用油高溫炒，所以質地偏向濕潤。✨炸春卷 $88佢哋都有啲平時食到嘅泰菜。呢度嘅春卷炸得香脆。蔬菜餡好清甜。✨泡魯達 $60泡魯達係緬甸北部常見嘅甜品。唔算好甜嘅椰奶甜品，有雪糕、果醬、布丁、西米。冇大多數東南亞甜品會有嘅椰糖或者棕櫚糖味。布丁嘅口感有啲似印度rasmalai嘅海綿口感。