潮味莊

潮州打冷一向係宵夜好選擇，油麻地呢間《潮味莊》就係其中一個熱鬧聚腳點，開到凌晨 2:30，近佐敦站都好方便。入面環境真係有d逼，幾張枱拍埋一齊，但反而令到成間舖好有「街坊 feel」，坐低就聽到隔離枱笑聲，氣氛好旺。店員態度好親切，落單快手，價錢合理，啱晒同朋友食吓潮州風味啤一啤!

😋 潮式凍魚大眼雞 ~ 魚肉雪白，肉質結實，味道鮮甜冇腥味，凍魚係打冷必食之選！

😋 滷水鵝片 ~ 另一樣潮州打冷必食嘅就係滷水，鵝片滷得入味，色澤深啡但唔會死鹹。鵝肉帶少少韌度，配埋滷水花生一齊食係幾正。

😋 韭菜豬紅 ~ 豬紅滑溜，入口即化，冇腥味。韭菜炒得香口，帶少少爽脆。

😋 鴨蛋蠔餅 ~ 蠔仔新鮮，唔算大粒但夠鮮甜，煎到外脆內嫩，呢度係用鴨蛋煎出嚟個蛋香更濃。

😋 椒鹽九肚魚 ~ 炸到外脆內軟，椒鹽味好突出，加上炸粉唔算厚，唔會太油膩。