刺身拼盤已有齊所有店內供應嘅刺身，包括有珍寶赤蝦、三文魚、油甘魚、希靈魚、北寄貝、八爪魚、馬刀貝、赤貝、鮑片、北海道角螺，所以先叫一份試齊唔同嘅刺身，然後再追加想食嘅款式。我就特別推介珍寶赤蝦，大大隻又夠鮮味，另外馬刀貝出面食放題比較少見，夠爽口，所以都值得追加。
海膽帶子係用帶子開半之後釀入海膽，兩款鮮味食材混合一齊就更加鮮上加鮮。
松葉蟹腳夠多肉，而且仍保留淡淡的海水鹹味，原汁原味就最好食。
我哋仲試埋燉湯，係蟲草花螺肉瘦肉湯，非常滋補。
1
出面食泰國菜叫個生蝦刺身，平均都要10幾蚊一隻，嚟到呢度可以任食，真係好正好吸引。
平時食開嘅放題都係一啲日式料理，而呢度嘅放題就加入咗好多泰式風味，呢個泰式炒椰菜苗我就覺得好好味，首先椰菜苗呢個食材喺放題真係好少有，另外佢加入咗馬拉盞調味，少少辣好醒胃。
另外仲有泰式燒元貝，雖然唔算好大隻，但係有得任食都已經值回票價。
八味黃金豆腐係新鮮炸起，上枱時仲熱辣辣，外脆內軟夾滑，又係一個推介嘅菜式。
仲有金葉香蒜炒墨魚鬚簡直係大排檔小菜風味，即刻想嗌返碗白飯！
而串燒就不過不失，三款之中我最推介雞肉串燒，如果有埋另上嘅沙嗲醬就更加冇得彈！
呢度除咗任食甜品之外，雪糕都係任食，雪糕品牌係香港製造嘅可可貝妮，勝在味道夠土炮同大眾化，可以試齊唔同嘅味道。
另外都要讚賞嘅就係店員嘅服務夠晒貼心，每位職員都好有禮貌，亦都會適時收取枱上嘅吉碟，真係值得一讚！
