神燈海鮮酒家 (V Point)

同Friend嚟食飯，試咗九款餸，水準真係天同地比。全晚MVP係豬手，肉質嫩滑、起咗骨，調味啱啱好，必叫！雞煲同樣出色，雞肉入味，食到尾都咁惹味。
至於伏味濃嘅有椒鹽鮮魷，淋巴巴唔脆，份量少得可憐；海蜇亦普通，可以skip。蝦醬蒸豆腐肉絲同脆炸豆腐都係預期之內，唔會難食但冇驚喜。仲有一味餸普通到食完都唔記得係乜。
唯一例外係一款充滿情意結嘅懷舊菜，我食嘅係回憶，味道已經唔重要。
總結：服務環境合格，必食豬手，其他餸隨心叫就得。為咗呢兩樣，絕對會返兜！

食到最尾已經好飽，呢個甜品都係試咗少少。係典型嘅中式酒樓Dessert，有嘅話幾好，冇嘅都唔會可惜。

呢個冷盤豬手真係正！肉質嫩滑，一啲都唔肥膩，調味啱啱好，仲要係起咗骨嘅，食極都唔厭！

呢個鹹香嘅豬肉同清淡嘅豆腐味道係夾嘅，可以互相平衡。不過蝦醬嘅味道太突出，搞到食唔出豬肉同豆腐本身嘅鮮味。咁講啦，佢又唔係整得差，只係我覺得未算係一道出色嘅菜式，試下無妨。

呢個脆炸豆腐就係食豆腐本身嘅豆香同外皮嘅酥脆，冇乜特別驚喜，味道就係你諗到嘅咁樣。

至於呢一味餸... 老實講，我連佢係乜都唔係好記得。味道普通到完全冇留低任何印象，你話好唔好食呢？

呢個椒鹽鮮魷絕對可以skip！張相影到嘅樣，就係佢上枱嘅樣，一啲都唔呃人。淋巴巴唔脆口，份量仲要少得可憐，切到碎濕濕，完全唔掂。

呢一味餸，對我嚟講係滿滿嘅情意結。已經好耐好耐冇食過，係細個嗰陣成日食到嘅味道。所以我唔會評論佢好唔好食，因為我食嘅係一份回憶同感情。

呢個雞煲幾出色！雞肉嫩滑，醃得夠入味，份量都唔錯，食到尾都仲係好惹味。

呢個冷盤海蜇就普通咗啲，唔係我食過最好嘅，下次可以唔使叫。