大盛檸檬味噌拉麵 （期間限定）
見OpenRice呢間餐廳嘅負評比例咁高，都不敢抱希望。不過見呢個期間限定款式有新鮮感，就嚟試吓，結果又比預期中好味。
湯底：有檸檬嘅酸味，但係酸得來唔會好霸道，又夾到個味噌湯底。味噌湯底味道幾濃郁，檸檬嘅酸味中和咗個鹹味，平衡得唔錯。
麵條：一般拉麵生麵質地，口感爽彈，冇咩鹼水味。
材料：有幾片雞胸肉，但係唔係整得好嫩滑，偏硬實。材料就冇咩特別。
👌🏼雞白湯拉麵
湯底：頗鮮甜，有雞味亦都有一點奶味。少少似稀釋咗嘅忌廉雞湯味。開頭一兩啖比較清甜，但係食落慢慢混和左麵粉嘅味道，就會變得混濁咗啲。
麵條：一般日式拉麵嘅嘅生麵。食到最後會有啲麵嘅味道滲咗落去湯底度。
材料：豚肩叉燒有輕微煙燻嘅味道，質地偏硬唔係軟滑嗰種口感。溏心蛋幾入味。
👌🏼牡蠣白湯沾麵
湯底：係杰杰地嘅帶點菇味嘅蠔湯嘅果種味道。味道可以，但又冇咩驚喜。
麵條：粗粗厚厚有嚼勁嘅沾麵質地。
材料：有一d 燒過比較乾身嘅角切豚肉，另外再有兩隻煎蠔，煎得都唔錯。
撈麵汁最後可以加d 高湯入去當湯飲。高湯比較有雞湯味，加左之後就飲唔到蠔味。
