伙記落錯單，本來叫4碗糖水變5碗，好啦，可能係我哋一開始落單落得衰，唔小心叫多咗碗，但係已經即刻叫翻個伙記翻嚟叫佢取消翻一碗糖水（個陣張單都未到廚房，最慘係我哋望住佢真係取消咗碗糖水，張單suppose係啱架！）。同個伙記講落錯，點知個伙記仲要駁嘴，話“明明同你覆咗單”，個陣條氣已經唔係好順，因為佢自己落單亂咗，仲要怪個客？點知！老闆娘事後仲要走出嚟，同我哋講：“已經幫你哋取消咗一碗，下次唔該你哋早講。" （我真係唔該你唔好唔該我，因為一定無下次）阿老闆娘，你當時唔在場，你又知係我哋無早講？連一點思考都無就推卸責任，簡直不知所謂。我即刻反駁 ：“頭先佢(個伙記)一擰轉面我就已經講咗。”
可惜，老闆娘無視我。
當我以為今餐甜品已經錯到無得再錯嘅時候，老闆娘（喺我哋面前）同個伙記講，“你做咩唔比碟人吖？” 吓
！？原來唔止張單錯，連最基本的上菜都錯？（原來每碗糖水下面係應該有隻碟墊住）大佬吖，你錯還錯，唔好喺個客面前講吖嘛，你唔講我真係唔知你錯，宜家你講完又比多個位我入你，何必呢？到食物，我叫咗碗“皇牌”楊枝甘露，芒果味唔夠，奶太多，所有食材被奶味完全掩蓋，一個字“差”
。唔怪得之隔離個間糖水舖好生意咁多，早知等位食隔離個間。
