灝

营业中

休息中

一大班人聚會，最好就係揀任食，咁樣個個都可以食到想食嘅嘢，再加埋有酒飲、又有歌聽，簡直就係完美 😍日式串燒就成日食，韓式串燒就真係反而小食，今次朋友搵到旺角登打士廣場嘅呢間灝，即叫即製嘅韓式串燒 😍 雞髀肉、五花腩、牛肋條，仲有帶子、魷魚同埋蝦，肉類同海鮮選擇非常之多，亦都有燒雜菌等嘅蔬菜選擇，全部新鮮燒起熱辣辣，調味亦都係香口惹味嘅，全部任食真心大滿足 😆食完串燒再配多個炸雞粒拼梳打，打卡一流之餘，個炸雞粒真心香口好味 🤤除咗串燒，自助區亦都有魚糕串、韓式年糕、Pizza等選擇，當中微辣嘅魚糕串簡直係我最愛 🤤 仲有香脆紫菜卷同埋餃子等炸物，仲有甜品紅豆鯛魚燒，熱辣辣又香脆嘅外皮包住香濃嘅紅豆蓉，餐廳嘅食物選擇可謂非常豐富 👍🏻另外呢度嘅飲品選擇真係多到一個點，除咗果汁汽水之外，重點係佢走嘅種類非常之多，除咗一般嘅啤酒之外，仲有手工啤同埋幾款韓國酒可以飲 😍 韓國酒無論燒酒米酒款式都非常之齊全，有啲真係比較少喺出邊餐廳飲到，強烈推介俾各位鍾意飲酒嘅朋友 💕另外呢度仲有 live music，可以點歌之餘，鍾意唱歌嘅朋友仲可以上台一齊 jam 埋一份！正宗有得食有得玩，成晚勁開心 🥳