八月茶室 (新港中心)

营业中

休息中

第二次幫襯八月茶室，試咗佢哋嘅小菜同埋晚市套餐。 招牌酸菜魚魚肉好嫩滑，去晒骨，完全唔腥，我哋叫咗份細Portion既，但份量都好足。湯底好濃鬱，夠酸夠濃味，酸辣度調得啱啱好，唔會太嗆喉，但又夠開胃。 除咗魚片，仲有秀珍菇、雞髀菇、萵筍、薯粉同大豆芽，樣樣都吸晒湯汁精華，而且各有唔同口感 - 薯粉煙韌；萵筍清甜；大豆芽爽脆；菇菌吸汁。  川辣辣子雞丁雞肉炸得香脆爆汁，辣椒同花椒炒得夠香，辣度適中，鍾意食辣食香口嘢嘅朋友可以一試。  黃金脆皮蝦球 蝦球外皮酥脆，鹹蛋黃醬香濃，蝦球唔算好大隻，但係蝦肉彈牙。  另外叫咗個晚市套餐。當日係晚市A餐，揀咗其中一個蝦乾瑤柱雜菜粉絲煲，套餐已經配埋白飯、例湯同熱飲，比起齋嗌小菜，會更加抵食。 蝦乾瑤柱粉絲煲蝦乾同瑤柱提鮮，雜菜爽甜，當日有菜心白菜仔生菜西蘭花四種雜菜，個湯底味道唔錯，粉絲吸盡湯汁，味道清淡得嚟夠鮮味。  服務方面，上菜速度快，員工態度OK，當日我哋坐到卡位，座位都舒適，餐廳仲有唔少月球嘅佈置。