坦白講，小編掙扎咗好耐不如自私收埋呢間有二十九年歷史嘅日本餐廳。雖然餐廳裝修非常平民，經過都根本唔會想行入去，但係正正係呢種平民嘅格局令食客有一種好簡單，好舒適，好似喺屋企嘅感覺。
首先，刺身。乖，聽老細話。主動同佢鐘意食乜唔鐘意食乜，問佢咩新鮮咩唔新鮮，然後叫佢幫你發板。食咗幾次，從未中伏，仲次次都有驚喜。唔講咁多，大家睇相就知啲刺身靚到爆。純粹講大拖羅，入口即溶，好味到講唔到嘢，完。
聽老細話嘅結果就係叫咗兩隻生蠔：一隻日本，一隻法國。法國嗰隻正常發揮。但係日本嗰隻好大隻，好厚身，連平時狼吞虎嚥嘅小編都要分兩啖食，口感非常飽滿，令我唸起之前去日本魚市場嘅回憶🥲。
最後，介紹兩款必叫熟食：第一，醬爆玉子燒。貨如其名，一切開入面啲芝士同粟米已經溶哂出嚟。每咬一口都拉哂線，可想然之味道幾咁濃厚，係小編老婆至愛。第二，鹽燒雞中翼，一份四隻。只可以講好味嘅燒雞翼四圍都有，但係日本嗰種味道，嗰種鹽香，喺香港好難搵到。
其實仲有好多嘢值得推介，遲下再寫。大家去試下先。
餐廳：海裕魚生壽司專門店
地址：九龍城侯王道11-13號地舖
Instagram: eatmud_
1
