楚撚記大排檔 (馬頭圍道) (已搬遷) 新店位置

早前同朋友去土瓜灣馬頭圍道食串燒，剛好見到隔隣有食店開張，門口放滿花籃，是一間食中菜的楚撚記大排檔，因為我們已食飽串燒，所以當天沒有入去食，今日朋友提起，約我今晚就往這新店食，試試菜式如何！食店有二間舖，我們入了其中一間，店內地方不大，但地方整潔，座位不會太迫。餐牌都有好多款小炒和炒粉麵飯等選擇。我們點了白灼鵝腸，鵝腸清洗得好乾淨，連肥膏也去掉，將鵝腸、芽菜仔、薑絲葱絲和特配的豉油汁一起撈匀，一口食落好爽口又好味！七味黃金炸一口金磚豆腐，個名好長但一睇就知好味，七味粉惹味，炸豆腐香脆，一口一粒，又脆又嫩滑。酥炸鲮魚球(配蜆蚧)，又是一味香口餸菜，純正鲮魚肉炸得面金黃色，入面魚肉鮮味彈牙，我還食到很香的果皮味，再點些蜆蚧，味道更豐富。頭抽豉油皇銀芽炒麵，大大碟又夠穫氣，頭抽豉油調得夠味，炒麵彈牙不油膩。食完飯重有甜品送，蕃薯糖水，蕃薯林甜，糖水薑味濃。雖然是送的甜品，店家一點也不馬虎，值得一讚！而且食物份量大碟又不貴，又沒有加一服務費，整體來說都低食。