雲川 米線．紅薯粉 (美樂花園商場)

屯門雲川米線好多人都話好出名，又話屯門名物，仲話要排隊添。雖然我唔係好好食一啲有湯嘅嘢，尤其是係晚餐，我都要特登入去食一次。聽人講話酸麻金湯出名，兩個人去，兩碗都係叫咗呢個湯研究吓。

落單個app好方便，有得揀埋面嘅軟硬程度。第一碗淨係有香茅豬扒，第二碗就貪心啲，叫咗辣腩肉、豬頸肉、同埋貢丸。

一嚟到大家交換咗啖湯飲吓，原來加咗辣腩肉個湯真係惹味好多，一定要試！豬頸肉就冇乜特別，其實豬頸肉喺邊度都好難難食。但係個香茅豬扒值得一讚，個皮好脆，啲肉好腍！

整體上我都覺得呢間米線唔差，肯定好過好多連鎖嗰啲，但係又唔係好似啲人講到咁神級，我之前肯定試過有好食過佢嘅米線。