店員提我哋最低消費(加一後)每人$100，睇返餐牌上嘅定價其實唔難湊數。落完單望一望枱上嘅教學咭，開始懷疑我哋跟唔跟到啲步驟...睇唔明圖片可以掃一掃QR code睇教學短片，我哋已經驗證咗，最好將啲步驟由頭睇一次先開始整，否則邊睇邊做係會跟唔切嘅
道頓崛蒜香炒飯$68 - 餐牌上飯嘅選擇寥寥可數，當日想食飯就揀咗佢。
見到堆食材嗰時有啲不知所措，因為教學咭係冇提及過炒飯嘅。最後我哋用僅有嘅知識將所有野煮熟再撈埋，大概係: 先落牛油起鑊，然後落蒜頭、再落飯同其他配料，一路keep住炒；豬肉片分開煎，見少少痴底就攞旁邊枝油逐少逐少加落去
1
食材熟得七七八八就將所有野撈埋...總之唔好燶+熟曬就唔會難食得去邊，因為秘訣已經喺預先配好嘅食材同醬料度
薄切豬肉片嘅肉、脂肪同豬皮比例啱啱好，煎過嘅豬肉片逼出油脂，落喺飯上面，加埋本身起鑊嘅牛油，令炒飯充滿油香，燒汁、蒜蓉同胡椒發揮佢哋原有嘅香味，估唔到咁簡單嘅配搭都做到呢種味道
雜錦廣島燒$118 – 跟住教學就會做到(至少望落)似樣嘅製成品
1
配搭嘅豬肉比剛剛炒飯嗰啲瘦。海鮮主要有蝦、八爪魚鬚同八爪魚腳，口感彈牙，但已經食唔出本身有冇鮮味，因為醬料太濃郁。椰菜起咗重要嘅角色，除咗解膩之外，仲增加水份，保持整份廣島燒嘅濕潤感。日式炒麵有少少似油麵，實淨有咬口，同煎餅嘅軟糯好夾。仲有脆脆嘅炸魷魚片，酸酸嘅紅薑，幼幼嘅蔥花作點綴。
而不敗嘅秘訣都係醬料！海苔同鰹魚碎落埋可能有少少咸，不過確實香好多
熱柚子蜜$20 – 足料
整體嚟講，自己落手整呢個概念幾新鮮，食物味道都幾好，不過記得預留多啲用餐時間，同埋要預咗食完餐飯個身會有油煙味
