海鮮種類方面都好多選擇，有大頭蝦、草蝦、基圍蝦（括住大頭蝦同草蝦比較好）。花蟹嘅肉較實，偶然有藍花蟹提供，味道鮮甜，肉比較鬆。切開嘅時候都見到膏，不過烚咗之後啲膏都跌晒喺個湯到冇晒。
另外都有唔同嘅貝殼類，花甲、沙白、美國蜆、厚皮蜆（厚皮蜆最好味)。另外仲有瀨尿蝦（麻麻哋）、鱔等等。
除咗自助撈海鮮，用手機都可以點到唔同類型嘅熟食，有粉絲蒸蟶子、粉絲蒸蟹、鵝肝多士、烤牛舌、烤乳鴿、烤魚餃、照燒銀鱈魚、燒蠔等等。居然熟食都唔會太求其，樣樣味道都唔錯。另外仲有榴蓮小吃滿足榴蓮愛好者添。
至於打邊爐湯底方面，叫咗椰汁雞湯底，不過就只係普普通通冇咩特別。主要都係食海鮮。另外都可以叫牛肉，就係普通肥牛質素，牛肉方面唔好有期待。
另外仲有自助飲品、Häagen-Dazs雪糕同少量甜品等等。
總括嚟講，海鮮種類好豐富，熟食都唔錯。因為我自己口味覺得海鮮打邊爐對比起蒸來食係喪失左d 鮮甜味，所以我嘅評分係“okay la" 。但如果你係鍾意拎啲海鮮嚟打邊爐，就會超滿足，同埋好抵食。
