講返食物，宜家呢到做緊個晚市二選一優惠，$38就食到「金銀蒜開邊蒸本灣龍蝦」，每位限半隻。龍蝦Size算係咁，而且勝在夠新鮮，金銀蒜嘅香味完全滲入龍蝦肉裡面，肉質爽口彈牙，蒜香十足，店員仲比埋刀叉我地，用叉一吉就起到大大啖肉超滿足！另外一個二選一就係「京式片皮鴨」，$188一食，四位起叫一隻，見到隔離檯都有嗌，店員會係面前即刻片，睇落都幾皮脆肉嫩。
另外仲叫咗鮮菠蘿咕嚕肉同三蝦乾撈粉絲煲。咕嚕肉炸得外脆內軟，酸甜汁調得恰到好處，加埋鮮菠蘿一齊食，開胃又醒神。粉絲煲就用咗三種蝦去撈，有蝦粒蝦乾蝦米，再有椰菜伴炒，食落幾夠獲氣幾惹味，不過其實上檯呢個粉絲煲同Menu show出黎果個樣都幾唔同，Menu係用蝦球，個墊底係大量粉絲，實物就係中Size蝦仁，粉絲都固然有，但更多嘅係椰菜，所以同我地想像都有D唔同，好彩味道都唔算差。
Overall都滿意呢餐，Menu其實仲有幾多套餐/優惠組合選擇，見附近都有幾多大Party食緊，加上環境舒適又有維港靚景，見酒樓佈置應該都會做埋婚宴酒席，感覺都幾得體！
