1
烤雞扒流心蛋摻摻 $133
首先揀咗款烤雞扒流心蛋摻摻，湯底係馬來喇沙湯，烤雞扒另上。摻摻麵條係用咗米粉同埋油麵，令到口感更有層次，入面仲有扎肉、豆卜、流心蛋，但係最鍾意都係烤雞扒，外皮香脆，雞肉嫩滑。
另外加錢叫咗炸豬頸肉配沙律菜， 豬頸肉大份啖啖肉帶油脂，仲加咗些芝麻點綴，底下有沙律菜同車厘茄，令到口感refresh啲
飲品加錢叫咗粉紅玫瑰雜莓綠茶，帶有微微嘅雜果香，入口清爽
燒烤叉燒流心蛋撈麵 $122
另一款就叫咗燒烤叉燒流心蛋撈麵，醬汁有醬油同埋冬陰功，最後揀咗醬油口味，麵條口感幾乾爽，底下有啲醬汁，建議攪勻食。叉燒份量都有五六片，比例主要以瘦肉為主，但係整得幾入味易咬。
小菜額外加錢叫咗滷肉燥小棠菜，滷肉嘅份量都唔少，拎來送飯都幾夾
飲品加錢叫咗款特飲，抹茶奶綠入口順滑，仲有層奶蓋，味道香甜
烤雞扒飯 $121
最後一款主菜揀咗烤雞扒飯， 醬汁分別可以選擇白咖喱或者係泰北咖哩，最後揀咗比較少見嘅白咖哩。白咖哩醬汁濃稠，烤雞扒就放係側邊，側邊仲有流心蛋、榨菜等配料，口感豐富。
小菜就揀咗加錢香脆墨魚釀豆卜，豆卜一共有六舊，上面釀咗啲墨魚滑，豆卜炸得脆口， 食落有啲似港式煎釀三寶
加錢叫咗季節花茶，係怡人養生之選
