燒肉屋 (清風街)

收工同朋友食飯，佢book咗天后一間叫”燒肉屋”嘅餐廳，去到先知，原來佢已經揀好咗我唔食嘅榴槤放題，最搞笑係佢自己都唔食榴槤😆。好了，一個榴槤放題而冇榴槤食，到底仲食唔食得飽？答案係飽到頂住。原因係，佢本身包咗嘅食物種類繁多，淨係牛都有好多款。喺牛之中最有誠意嘅係m7澳洲和牛，不過個人覺得封門柳更有口感，而荔枝牛肩胛都好特別。不過個人覺得今晚最好食，係蒜蓉牛油帆立貝。燒完之後，牛油味香爆。泰式生蝦亦都做得有板有眼，夠凍又大隻。其他肉類都唔錯，同樣地有好多選擇。想食其他嘢嘅，呢度亦都有啲炸小食，燒翠玉瓜，菠蘿同粟米等等。燒肉當然唔可以缺少嘢飲，呢度有埋嘉士伯啤酒，算係有誠意，個人仲飲埋Asahi。至於甜品，Häagen-Dazs已經係標配，不過能得利檸檬可樂雪條原來都幾好食，聽餐廳講係新出嘅！呢度嘅氣氛都好好，周圍都係傾偈飲酒嘅氣息，好適合喺度同朋友燒肉一番。就算唔食榴槤，淨係食其他嘢，呢個放題都已經返到本！