一嚟到見到呢度嘅裝修都幾有印度風味，同埋座位分隔得好開，唔會好迫，環境昏暗，都幾適合約會。
一開始朋友就介紹呢個咖喱雞配印度薄餅，咖喱雞一上枱已經聞到好香，佢係無骨嘅雞，而且食個咖喱唔會太辣，但係好香口，啱晒唔鍾意食辣嘅朋友。
本身唔係太鍾意食印度烤餅，因為多數都覺得比較乾，但係呢度整到唔會太乾，食落有少少似麵包同pancake之間，點埋咖喱汁真係一流啊。
呢杯Mango lassi真係好出色，因為一直覺得印度嘅飲品都比較甜，但係佢一啲都唔會太甜之餘，飲落會飲到芒果嘅香氣，非常適合夏天嚟試吓，非常解暑。
見到隔籬枱都叫呢個印度烤雞，咁就一於叫嚟試吓啦。佢嘅烤雞好大隻，份量好充足，食落皮脆，而且雞肉好嫩滑，而且佢嘅調味好充足，唔使點任何汁都好好食。
呢間餐廳顛覆咗我對印度餐廳嘅睇法，佢除咗乾淨之餘，環境都好好，非常推薦大家約會或者敘舊嚟試吓。
