寶湖海鮮酒家 (租庇利街)

营业中

休息中

放假出中環配定啲敏感藥，配完之後同兩老飲茶。兩老自己嚟過呢度飲覺得幾好食，所以就想我試吓。11:00嚟到，12:30埋單散叫就有折扣優惠。但係一個鐘食得太趕，最後決定叫午市套餐慢慢食。平時喺其他區分食午市套餐真係唔可以比較，始終係中區價錢相對嚟講係高啲，但係食物嘅水準真係不錯，竟然碟燒鵝上枱嘅時候係脾位，亦都好有鵝味，師傅亦都好細心脾位起埋骨，真係啖啖肉唔會淨係肥膏。另外蝦餃、韭菜餃同蝦腸都好飽滿，蝦肉亦都好爽口。另外個柱侯牛筋腩都好入味又夠腍。同埋個牛腩撈粗過份量都幾足牛腩都夠腍唔會黐牙。平時屋企好少食通菜，估唔到佢唔係灼係真炒，雖然係炒，亦都唔會食到成口油。套餐意外加咗個陳皮紅豆糕，係幾香甜。服務方面，雖然唔係常客，但係都招待得唔錯，完全冇其他舊式酒樓淨係照顧上客嘅陋習。兩老冇介紹錯，下次可以試吓下午茶。