下晝2點左右，顧客較多，大約有十幾人排隊。店舖職員幾殷勤，主動喺顧客輪候時提供資訊，話可堂食1枝，另一枝可以票券形式，喺有效期7日內換軟雪糕。最後，我哋買咗2套，即係2枝堂食，另外2枝領券。
黑朱古力軟雪糕：上手幾靚，但size較細；可能雪糕機不停操作，所以製冷效果未係最理想，軟雪糕的定型一般，雪糕易融，享用時要同時間競賽，見到有父母俾枝雪糕細路食，都搞到好「呢hea」，朱古力雪糕滴到成地都係，其他舖頭多得Godiva唔少；印象中係首次食佢的軟雪糕，覺得Godiva的杯裝黑朱古力雪糕好食啲，軟雪糕的朱古力味冇咁濃，而且質地較「削」，食完有空虛感；數Godiva店內食品同飲品，都係黑朱古力沙冰最出色
如果唔係買1送1，就唔建議買嚟食，而若然佢恆常推出買1送1，我就冇乜動機衝去食。而家物以罕為貴，平時覺得貴唔幫襯，遇上突發優惠，就奢侈一下，食到當賺到。問心，食完冇乜記憶點，亦唔特別有飽足感同滿足感，當湊熱鬧、趕熱潮就好
