四寶撈粗 (腩、牛丸、雲吞、魚片魚蛋)
粗麵充滿彈性同咬口，沾少少湯入口夠爽，最開心既係佢唔同其他港式麵食完會有(霞)氣留係口腔，我就真心鍾意個麵底
一寶係佢既牛腩同牛丸都有重牛味，鍾意食牛既人有福了，肥瘦均勻，牛丸彈牙又濃味，唔似坊間啲唔知咩肉打出黎既牛丸，呢度值得一推
二寶乃雲吞，因為我係食撈麵，個人口味我會將佢浸一浸隨麵附送既湯先入口，皮薄而入面既蝦都頗鮮，肉質甜美，好味！
三四寶就係魚片魚蛋，比起其他兩寶佢排第三唔代表佢唔得，新鮮炸起都必然係水準以上，彈牙同魚味都有Feel
切腩四寶撈粗
同女友都一樣想食四寶粗，咁我唯有嗌切腩啦，成碗野唯一唔同就係滷過既牛腩同有埋牛筋，如果鍾意濃味啲同食牛筋既話就推介呢碗，牛味一樣香濃，其他就一樣
紫菜湯
冇諗過係咁大碗同咁大塊紫菜，唔知點解我飲到甜味，海帶既鮮甜令人有開胃湯既感覺，好味
酥炸魚皮
佢係用紙袋成份上，撕開袋仔，份量都算幾好，夾一舊沾下湯再食會更爽
消脂青檸梳打
本來想嗌紅豆冰架，但又怕肥，於是呢杯梳打就岩哂了，飯後用黎沖淡口腔既油膩感一流
西多士
冇諗過上枱既西多士係咁厚既，明顯比其他舖頭升級厚左，佢雖然冇花生醬係中層，但我食到淡淡既檸檬青香，唔知佢係點樣融入去既呢
油菜
可以揀生菜或者菜芯，大大匙蠔油車落去配合新鮮菜，唔夠仲可以再加，正
另外我頗喜歡店家個辣椒油，佢地話係祖傳DIY用十幾款材料整出黎，我用黎配合撈粗牛腩簡直無得頂，辣度出色但唔會停留好耐，大家一定要試!!
10
1
7
