PHI COFFEE & PANCAKE喺啟德體育園北園呢間分店，成間舖一入去好有「城市綠洲」feel，成排落地大玻璃將球場同戶外景色都帶入嚟。
室內用咗大堆木色家俬同暖色燈光，配合綠色植物做點綴，感覺好似去咗文青cafe，幾自然舒服。
靠窗位望出去就係啟德體育園一帶開揚景觀，同平時商場入面嘅cafe好唔同，呢度多咗一份空氣流通同開放感，坐耐少少都唔覺焗促。如果黃昏時間嚟，外面光線慢慢變暖，店內氣氛又再柔和啲，幾有度假味。
頭盤點咗楓糖烤南瓜沙律，南瓜切片烤得好香甜，加埋楓糖之後更滋潤，入口非常鮮甜，啖啖肉感，沙律入面仲有果仁碎，令到口感層次豐富，食落去爽口又冇負擔。
主菜地中海式蕃茄海鮮配吐司，海鮮非常新鮮，啖啖肉，配搭蕃茄汁味道好入味，膠質同肉質都分明，食落去Juicy又有鮮甜，配埋微烤嘅吐司吸晒汁，仲多咗層次。
法式鵝肝燴意大利飯，意大利飯煮得啱啱好，煙靱之中帶回彈牙，鵝肝味道超惹味，每粒飯都吸收咗鵝肝嘅香氣，入口好嫩滑又好冧。
聖誕版限定梳乎厘，焦糖紅寶石玉桂梳乎厘，班戟真係好蓬鬆柔軟，好Q好煙靱，蛋香重，焦糖同玉桂味道層次豐富，甜而不膩，配合紅寶石果乾，有少少酸香，好啱女仔食。
開心果咖啡香氣十足，入口有堅果味，好有豐富感覺。紅漾士多啤梨梳打賣相好靚，氣泡十足，酸甜味道透心涼。
