4
‣ Banoffee Pie $95
‼️超級推薦‼️相信甜品有遷就到香港人嘅口味，啲忌廉完全唔會死甜，可以放心大啖食。濃郁嘅焦糖香味同埋香蕉配合得好好，而忌廉又可以化淡到太妃糖嘅甜，反而有少少清新嘅味道帶出，脆脆嘅餅底令個味道更加有層次。我覺得佢嘅花生雪糕係畫龍點睛，好食到不得了。
‣ Sausage Rolls $110
Sausage Rolls一直都係我好鍾意嘅小食，外脆內軟，肉餡嘅味道濃郁，而胡椒香料味道可以帶出豬肉餡有幾好味。隔離有芥茉醬俾你點，但我覺得就咁食都好正。
‣ Scotch Egg $120
同朋友講呢個真係名副其實嘅炸蛋，依然都係炸得金黃酥脆，望到中間嘅流心蛋都覺得超吸引，再搭配肉餡，口感真係好有層次。
‣ Beer Battered Haddock $195
我自己好鍾意用啤酒漿炸嘅嘢，覺得有獨特嘅香味。魚肉依然鮮嫩，食吓食吓覺得塊魚都幾大份。可能有啲人見到佢啲青豆蓉會覺得得人驚，但係其實我又幾鍾意，可以平衡到油膩感。
‣ Australian Rib Eye $260
牛扒肉味偏濃郁，唔會好多油花，所以食落去都唔會覺得太膩。旁邊嘅薯蓉亦都處理得好好，混合住好濃郁嘅奶香，如果唔係太飽嘅話我應該會食晒成個。
‣ Two Moons Gin $130
見到係香港本地，當然要叫一杯支持吓，入口好順滑，但有少少嘅辛口。我亦都品嚐到絲絲嘅花香，覺得都幾驚喜。我自己都幾鍾意呢個味道，會一杯接一杯咁樣飲。
‣ Tarquins Blackberry $130
朋友諗唔到嗌咩，叫我嗌杯fresh啲，呢杯真係冇揀錯。容易入口、又夠清新，唔係成日飲開酒嘅朋友飲呢杯都會覺得好開心。
