麥子白蘭花，淨係飲到花椒味，食店供應的酒精飲品全部都係手工啤，好多好多樽裝手工啤﹗內部及後欄裝潢簡約、乾淨、整齊、舒服、有草地有裝飾有枱櫈，空氣清新、無異味無垃圾，而且夜晚有燈飾好溫暖好浪漫。
廚師沙律，暖過室溫沙律菜，粗糙乾爭爭唔知放左幾耐，新鮮度低下，只有欖油黑醋調味，黑醋勁甜濃稠，酸味薄弱。蒜香辣椒炒活蜆，份量也不少只售$88蚊。火箭菜亦叫芝麻菜，放於炒蜆頂配搭幾新穎，有著獨特的甘苦味。蜆肉脹卜卜嚥嚥韌韌，蒜辣香口惹味，蜆肉仍保存少許鮮味少許肉汁，跟意粉一齊炒應該好美味。焗法國田螺，炸蒜蓉味道與田螺及薯蓉不太襯，撞埋一齊怪怪的。田螺肉腍啤啤淡茂茂，加多點牛油會更美味。
伊比利亞風腿卡邦尼手工意粉，傳聞已久的手工意粉，終於有機會一探究竟。意粉嚥韌到似烏冬彈彈彈，煙肉碎無煎過無溢出煙肉油，意粉無跟煙肉油炒過，無用黑椒粉調味，不熱幾乎室溫。自撈半熟蛋、淡忌廉、沙律醬、沙律菜，整體似食沙律。清淡到可以做頭盤，微暖手工意粉混生蛋黃、巴馬火腿、沙律菜，非常淡茂茂。
香煎美國安格斯牛肩膀，前無古人後無來者的絕世兇靈版﹗新鮮出爐夠晒熱辣辣出晒煙，完全無閑置直接隊出黎開餐，我食食下真心頂唔順要休息陣再繼續，滿口血腥味，唔知以為自己邊食邊流牙血添。都好多年無食過血淋淋牛扒一鋸噴血，流血不止﹗存在感薄弱的牛味是有的，不過血腥味更加強烈，無從抵擋，滾上大量燒汁會比較舒服。
配菜們死況慘不忍睹，案發現場實在太血腥，所有配菜都已被染紅，薯蓉、薏瓜、脆肉瓜、珍珠筍、等等。薏瓜、薯蓉、珍珠筍、脆肉瓜作配菜，瓜類微暖爽脆多汁，薯蓉合格但吸盡牛血後有點驚嚇。其實我的 3 成熟牛扒造得不錯，外香內嫩呈現鮮紅色，最敝流血不止呢。
凍齋啡走甜，玻璃杯印上 Trust me I am special？Are you sure？茶記即溶咖啡水汪汪淡茂茂，飲管有咁大碌得咁大碌、冰有咁大塊得咁大塊，兩啖啜完。
