今次嚟到位於西沙GO PARK嘅貓員外精釀酒館，主打自家創新研發嘅手工啤酒同埋由經驗豐富嘅中西方廚師團隊聯手打造特色Fusion菜，融合中西方嘅口味。餐廳環境舒適闊落，提供室內外座位，同時亦係寵物友善餐廳，另外設有大螢幕播放熱門體育賽事、美式桌球同埋飛鏢，集美食同埋休閒娛樂嘅空間。
炸菜肉丁蘭王蛋薄餅
呢款Pizza係全港首創同西沙GO PARK限定，意式加上港式茶記嘅Fusion薄餅。餐廳設有大型Pizza烤爐，廚師利用烤爐炮製拿波里餅底薄餅，保証新鮮出爐熱辣辣，薄餅加上炸菜肉丁，味道鹹香，沾上半熟蛋黃好有儀式感，而餅底充滿麥香，旁邊燶邊帶有焦香，餅底口感煙靭。
烤牛腹排配中式韭茜青醬
中西合璧嘅烤牛腹排，火侯控制得啱啱好，肉質粉嫩，牛肉味濃，口感軟腍有肉汁，配上強烈味道嘅中式韭茜青醬，刺激味蕾；配菜有外層微脆，內裹鬆軟嘅焗薯仔，非常滿足。
炸魚墨西哥玉米卷
炸魚酥脆，蔬菜加上蕃茄粒味道酸甜開胃，口感清爽，配上軟糯嘅玉米卷餅皮，味道唔錯。
葡萄熟了
RICHKAT貓員外獨家研發同埋生產的手工啤酒，包裝以貓貓為主題，好可愛。手工啤酒曾獲得多項國際獎牌，而葡萄啤酒以柏林酸小麥為基底，加入咗大量葡萄汁，容易入口，帶有果味同埋酸甜口感，氣泡感十足。
