添好運點心專門店

【油尖旺區】【添好運點心專門店】識咗脆兒姐好多年，但係一直都冇機會單獨食飯。今次我哋因為一齊喺高鐵站做完嘢，適逢大家都預鬆咗時間畀下一個 schedule，所以可以偷少少時間食個飯。我哋揀咗食添好運，間嘢都幾難去，喺高鐵站望就望到，但係出入口得手信舖後面條扶手電梯。

我哋搵咗一輪先去到，坐低就要 $16
茶位，係兩位嘅價錢，唔貴。先食咗 $32 嘅「蠔皇鮮竹卷」同 $40 嘅「黑椒醬汁蒸金錢肚」，兩者質素都相當平庸，鮮竹卷幾夠熱，金錢肚就比較腍身。之後到 $35 嘅「蜜味叉燒腸」，冇乜米香，唔算滑溜，都係麻麻哋。

我食多少少先夠飽之下，叫埋 $28 嘅「家鄉鹹水角」，唯一嘅優點又係夠熱。脆兒姐用多 $15 叫咗罐「無糖可口可樂」嚟隊，埋單 $166。呢個價錢兩個人喺高鐵站食又確實唔貴，不過遊客應該對呢個品牌嘅港式點心期望甚高，呢個質素又真係代表唔到香港。。。

（地址：尖沙咀柯士甸道西3號香港西九龍站B1M夾層WEK B1M-1號舖）

1

5

4