漁樂 (置富第一城)

【沙田區】【漁樂】大家一見到呢篇嘢，可能會覺得我背棄咗唔寫大集團餐廳嘅理想，又或者覺得已經揭到我「呢本雜誌」嘅「廣告頁」。令大家失望嘅係我今次寫呢間餐廳係食咗兩餐而呢兩餐都係自費嘅，我做 1am第一城 係純粹益街坊嘅。

第一次食呢間係食佢哋嘅茶餐，我就揀咗 $38 嘅「香茅雞髀」配「椒鹽炸豬皮」，通常呢啲餐都係配薯條或者沙律，配豬皮確實係特別，而且味道都可以。反而隻雞髀就認真麻麻，見佢燒得有啲深色仲有啲期望，但都係失望。

嘢飲方面我加 $3 飲「凍美祿」，從來都好中意飲，唔使去新加坡，呢度都有得跟餐飲，正。我仲加 $15 叫咗兩串「沙嗲雞肉串」，反而呢碟唔差，令到埋單 $56 嘅價錢顯得更加抵。促使咗我第二次去，都係食佢哋啲茶餐。

呢次係 $35 嘅「芝士火腿手抓餅」配「薯條」，屬於輕食類，味道都唔差喎，可能我本身中意食 roti 會有少少偏心。嘢飲我今次就飲唔使加錢嘅「熱美祿」，都係正，咁我本身中意飲吖嘛。埋單價就係 $35，下午茶嚟講可以。。。

（地址：沙田銀城街1-2號置富第一城1樓107-108號舖）

1

1

30

2