泗興食堂

同同事收工搵食，嚟到柴灣呢間由同事極力推薦嘅泗興食堂，果然冇令人失望！餐廳充滿地道大排檔風情，晚市坐滿人，氣氛熱鬧。

頭盤嘅「鴛鴦鳳皮甲」絕對係驚喜之作！用雞皮包住彈牙墨魚滑炸成金黃色，外脆內軟，咬落油香滿溢又唔膩，底下鋪滿清爽嘅涼拌青瓜絲、雞絲同海蜇絲，分量十足，開胃又惹味。跟住嚟嘅「蝦多士」即叫即炸，多士酥脆，蝦膠鮮甜多汁，真係超級juicy！

4

鴛鴦鳳皮甲

蝦多士

「豉椒炒蜆配煎米粉」鑊氣逼人，蜆肉鮮甜無沙，豉椒味濃郁；煎米粉底吸盡精華，香口得嚟又帶微脆，令人食唔停口！「臘味煲仔飯」係冬日必點，臘腸、潤腸鋪滿成個煲，飯粒分明，仲有微微飯焦，撈勻臘油香氣四溢。另外「炸蠔」亦炸得外脆內嫩，蠔味濃郁。

豉椒炒蜆配煎米粉

臘味煲仔飯

整體而言，泗興食堂保持傳統大排檔風味，分量大、價錢合理，絕對係區內抵食之選！建議多啲人一齊去可以試多幾款菜式，會再encore！
#柴灣美食 #大排檔風味 #泗興食堂 #鑊氣小炒 #鴛鴦鳳皮甲 #蝦多士 #煲仔飯 #同事飯局