1
鐵板餐價錢非常親民，最抵食嘅當然係$20嘅吉烈宮崎豬柳鐵板餐，6pm後供應，每天限20份，我哋點咗一份，上檯時完全嚇親，因為份量絕對無將貨就價，足足有兩大塊之多，而且每塊都非常厚切！豬肉仲要用上宮崎豬柳，肉質爽彈有嚼勁，炸漿都好薄，淋上蒜蓉汁後，非常惹味！
其他鐵阪餐一樣價錢相宜，$58-138不等，而且不收加一，難怪平日晚市都座無虛席！、
牛柳鐵板餐($128)
採用紐西蘭牛肉，肉味雖然唔算濃，但肉質好軟腍，毫不嚡口。我特別欣賞餐廳強調所有肉類都不以鬆肉粉或食粉去醃，食得健康！牛柳同黑椒汁係絕配，上枱時，店員就淋上黑椒汁，鐵板滋滋作響，聲音好療癒！
美式什扒($78)
呢個又係充滿童年回憶，細個我最鍾意就係食什扒，因為款式最多，感覺最豐富，啱晒貪心嘅我！呢度嘅什扒份量好慷慨，眼見幾乎所有客人都食唔晒，好誇張！有雞翼、豬扒、司華力腸、煙肉、雞扒等，配上洋蔥汁，太好食！
鐵板餐+$22即可有埋餐湯、餐包、飯/意粉/薯條、飲品及甜品。
餐包好鬆軟，比想像中好食！
餐湯揀咗一紅一白，羅宋湯好足料，香甜濃郁。
忌廉湯都好creamy，味道濃稠，兩款都誠意十足。
薯條係我鍾意嘅淋薯條，不過食到後期實在太飽啦，所以食唔晒，有D可惜！甜品係菠蘿啫喱，羅拔臣啫喱加上花奶，又係回憶殺，正！
最後加埋餐飲，好飽足呀！
