。樓上餐廳佔用面積全層，左方以玻璃間出大廚嘅工作室，透明度極高。用餐大堂開揚光鮮，最煞食就係個靚靚海景
。四周簡單以酒樽佈置，足以配合法文店名「terroir」嘅根源，即釀酒時所講求嘅天時地利人和因素
；所謂美酒伴佳餚，其實此概念亦可應用於烹調美食上，起名者確真有心思。派對被安排入座可容納八人嘅廂房內進行，私人空間感更足。廂房設下嘅最低消費額為$5,000，因店主Simon哥哥深知八人訂座早已超額，所以自動升咗呢，誠懇之舉令席上嘅長輩尤其感動
！裝修唯一問題係太多回音，加埋背景音樂難免會覺得有點嘈雜
；小弟愚見，如果可以調低背樂嘅音量及於地上加幾塊可吸音嘅地毯的話，相信已可解決問題。聖誕節將近，室內已擺出應節小飾物，流露著節日氣氛，仲襯哂對面海嘅燈飾添。
訂座後不久即收到店子傳來嘅確認訊息及十一月份嘅晚市餐牌。為方便廚房備菜，XO仔早就要求大食會組員選訂菜單。晚餐基本上有四道菜（$550/位），包有頭盤、湯、主菜、甜品，每一道菜都有兩至三款選擇，加多$100可要多道意大利粉，即變成$650嘅五道菜晚餐；配埋酒都只係另加$280，一啲都唔貴。餐桌上擺有齊備嘅自用餐具及酒杯。不得不提嘅就係餐店一率免收開瓶費，一向嗜杯中物嘅肥肥家族自然係自備佳釀，嘻嘻，不過飲咗幾多枝就唔透露啦
！人一到齊，即有暖手鬆軟嘅麵包食，伴配巧薄香濃嘅火腿片及軟滑芬芳嘅香草蕃茄牛油，麵包美味程度足以令隱世廚神HH Uncle大膽估計包品為自家製
，點知真係俾佢估中咗喎，契妹即大讚連麵包都自己整其實係證明大廚對食材及烹飪嘅要求
，正正為「terroir」嘅理念，因為焗麵包嘅心機、時間、功夫遠超過煎一塊牛扒。頭盤共有兩款可選，其中「Pan seared foie gras with toast」要另加$80。Deep-fried crab cake with orange cream：炸至金黃嘅蟹餅外層香脆乾巧，中間嘅蟹肉絲幼嫩鮮甜，點上橙味調味汁液即倍添清新
，細細件嘅份量剛剛好，吃畢毫不溜滯。湯品同樣有兩款可選，「Mushroom Soup」外表正正常常。Bouillabaisse：橙美亮麗嘅法式海鮮湯芳香柔滑，鮮濃足料
，當中嘅蝦肉爽厚彈牙、帶子軟嫩鮮甜、蜆肉亦甜潤多汁。正當意大利粉環節差不多全部人都點選咗大閘蟹意粉時，哥哥卻選擇咗紅蝦意粉「Carabinero spaghetti」。Hairy crab linguine：平心而論，意大利粉麵條質感煙韌有彈性，當做嘅大閘蟹粉亦鮮嫩甜美。季令菜式其實相當美味，但係大肥爸爸講得好啱，要配合幼嫩嘅蟹粉如果換上超級幼身嘅天使麵效果應更為恰當；Simon哥哥聽取意見後有感認同，即轉告師傅並決定翌日二人先試一試，認真嘅態度又再一次贏得長輩嘅讚賞
。主菜共有三款可選，哥哥繼續揀冷門嘅魚魚「Grilled sea bream with sauteed spinach」。契妹同蕃薯uncle就揀咗次冷門嘅豬豬「Grilled Iberico pork rack, vegetable, pepper sauce」。Australia M6 wagyu striploin with gratin potato：冇得揀幾熟嘅澳洲和牛上枱時約五、六成熟，厚身得黎極為鬆潤，而且肉汁豐沛，如果可以俾細佬揀和牛生少少就更加理想。甜品選擇有二，一款為意大利代表「Tiramisu」。Apple pie with ice cream：蘋果批嘅批皮半脆半腍，蘋果蓉餡心柔韌微甜，香潤輕盈，當中嘅肉桂香極富聖誕氣息
，伴配一球雲尼拿雪糕即加添軟滑嘅口感，簡單味佳。灣仔低調嘅樓上西餐廳「terroir」環境簡潔，服務生友善客套，晚市四或五道菜套餐用材新鮮，節令菜式美味可口，睇得出大廚由麵包到甜品都用心製作，平均每人消費約八百多元絕對合理，最抵當然係全面免收開瓶費啦！細問下得知閒日包場最低消費額為$15,000，週五至週日則為$20,000，聽落真係幾抵玩，有意開P嘅朋友不妨考慮。…查看更多
