Eaaat.here

第一次寫食評，因為覺得真係值得推介。無限時嘅燒肉+邊爐真係好少見，價錢亦都相對便宜，最貴嘅套餐都只係338仲要免加一，肉嘅質素對得住價錢。雖然唔收服務費，但係除咗嘢飲自己拎之外，服務係非常周到，唔使舉手佢哋已經自動波過嚟加湯收碟，所有員工嘅態度都好好。地點其實只係奧海城附近，位置好方便，唔應該咁少人幫襯，希望大家都支持下小店，高質嘅餐廳真係買少見少。環境舒服又chill，好適合一班朋友聚會，我哋岩岩都坐咗差唔多4個鐘先走，外面嘅餐廳相信好難做到，下次一定一定會再嚟。…查看更多

經過見到呢間免加一，無限時火煲+燒肉放題服務一流，店員態度好好👍🏻燒到甘上下，店員會主動換鐵板。牛既質素對得起個價，唔差的，但食物選擇就無出面甘多。座位唔會太迫夾，坐得好寬鬆…查看更多

我同男朋友上網見到依一間餐廳可以食足六個鐘真係好特別，而且見到好多人都話要推介。再加上真係性價比好高，佢哋俾嘅質素唔會差得過出邊比較貴價錢嘅餐廳。👍🏻想飲酒嘅話，加多$88就可以任飲。肉質方面真係冇得頂，仲要免加一，真係唔知邊度仲有。最好嘅係老闆同埋員工非常之好服務態度👍🏻我諗呢一間餐廳係我哋會繼續回頭食多次嘅餐廳之一。所以如果真係想試吓的話就要提早預訂位，因為裏邊唔係話太多位，再加上無限時。…查看更多

黎慶祝情人節 店員好好 好有禮貌 態度好好 好細心 有提供一次性圍裙 見我地啲袋放喺另一張凳就主動俾多兩件圍裙以防被油彈到 好意想不到有呢個服務質素 可能食慣大型連鎖嘅放題 出黎食放題已經唔求服務質素 但估唔到成個食嘅過程可以冇被人忽略 價錢仲好抵 牛都好有肉味 最主要係又可以打邊爐又可以燒肉 而且上菜亦非常快 店員見你鐵板燒到咁上下 亦主動去換 場地講真唔大 但都正正因為咁而唔會太嘈 剛剛好嘅寧靜 店員都唔會忽略你 已決定會再encore…查看更多

老婆請我來慶生 食了288封門柳套餐可以電話/whatsapp book位先講服務 服務水平很好 會介紹食品收碟換燒烤爐完全唔洗開聲 服務態度有禮貌 到食品 封門柳打邊爐超正 有牛味又唔韌牛舌 用來燒又高質 鯛魚兩種食法都好食烏冬配鰹魚湯底相當夾野飲除左盒裝 重有咖啡奶茶個啲手沖任叫 奶茶有茶記味道座位相當鬆動 坐得舒服 唔會頂手頂腳可能食物種類選擇較少 但基本上只會食出色個幾樣食品整體無投訴288免加一 無限時 都算係性價比極高 …查看更多

除夕晚訂左八點雖然晏左先有得入座...眼鏡哥哥話因為無限時...都唔趕得人走...啱啱有人埋左單...食完雪糕就ok...真係好好禮貌揀左288套餐..無限時仲免加一...有得燒肉又有得邊爐...食物質素真係不差...配料選擇一定無其他放題甘多...但已經好足夠...炸物係新鮮即炸...唔似得出面甘炸定再出街埋單仲有得食埋雪糕樓面只係見到一位女士同眼鏡哥哥做...完全係照顧晒所有客人...又主動加湯同換爐板...完全感受到佢地係用個心黎做生意..呢度短短兩個鐘嘅體驗真係俾到滿分...多謝你地…查看更多

叫咗兩個午餐嘅套餐，一個係天婦羅蝦豬扒飯另一個係松葉蟹蟹膏釜飯。雖然係日本餐廳但係天婦羅餐佢哋連天婦羅汁都無，求其俾咗打邊爐嘅豉油我哋，成件事好fusion。松葉蟹蟹膏飯用咗15分鐘先上到菜，但上菜之後原來仲要等佢煮實在唔明點解要咁耐先可以上到菜🙃個飯撈完係白色嘅，因為蟹膏同松葉蟹嘅份量少之又少，就算加完佢嘅火鍋豉油食落去都係無味。蟹肉小到撈完見唔到，成鍋飯淨係比一舊西蘭花真係多謝晒🤡一定係人生食過最難食嘅釜飯！…查看更多

封門柳火鍋燒肉放題（$288@，不收加一）無睇錯，係火鍋 + 燒肉，一次過滿足兩個願望。火鍋有五款湯底揀，清清哋揀咗鰹魚鍋；燒肉係用酒精爐加坑紋鐵板。落單係用剔紙仔，並唔係依家普遍用嘅自助 scan QR code 落單。・封門柳，總共食咗4碟，碟碟都唔錯，大碟，唔係薄切，有啲厚度，唔多肥膏，燒肉同火鍋都啱，有肉味，尚算嫩身，唔嚡。・牛舌，食咗2碟，有大有細，正常厚度，比較啱用嚟燒，爽口，唔韌。・鯛魚片，食咗2碟，大片，有啲厚度，見人講用嚟燒，即管試吓，又真係幾好食，微微脆身，魚皮及魚肉都爽口，肉質紮實唔會散開，如果用嚟火鍋，肉質就滑啲，魚味會多少少。・牛肩胛，純粹要咗1碟試吓，大大片，偏瘦，少少肉味，唔算嚡但唔係嫩，只適合火鍋。・極上豚，又係要咗1碟試吓，肉質偏爽，火鍋同燒肉都可以。其他火鍋配料唔算好多，但因為主要都係食肉，所以無咩所謂，要咗紫菜響玲、牛柏葉、水魷魚、芥末魚丸、墨魚丸、皮蛋、同埋幾款蔬菜，全部都合格以上（啲蔬菜幾新鮮靚仔）。另外仲有幾款小食，炸午餐肉、一口芝士、吉列炸蝦、吉列炸帶子，全部即叫即炸，脆卜卜熱辣辣，不錯。最後飲品，款式唔算多，基本嘅罐裝汽水、盒裝茶、手沖咖啡奶茶、梳打特飲。午市放題由12：00至3：30（無限時），但慢慢食，兩個零鐘已經好夠，3點未夠就埋單走人了。總結：食品質素唔差，上菜速度快及齊，服務好（主動火鍋加湯，燒肉換鐵板，收吉碟快，仲提供燒肉用嘅一次性圍裙），裝修及環境舒服，收費合理，有機會應該會翻兜。…查看更多

位於大角咀利奧坊嘅Eaaat here, 主打日式火鍋🫕、鐵板燒肉🔥，提供火鍋燒肉放題，二百多。而午市定食就更加抵食，80蚊左右再有8折。一碟肉有4片🥓🥓🥓🥓建議叫有拼牛舌👅嘅餐，有兩碟肉感覺豐盛啲。坦白講，肉嘅質素唔算好高。除咗壽喜燒同燒肉，午市定食仲有各式魚生飯、日式熟食丼飯，都幾受附近打工仔歡迎。樓底高、大落地玻璃、環境舒服，又唔會太多人，有禮服務。餐廳門口有標位，揸車一族都方便。…查看更多

晚上經過利奧坊，發現呢間放題，冇加一，不限時，價錢還唔錯，就入來試下。兩個人食，邊食火鍋邊烤肉，唔錯！呢個鰹魚湯底唔錯，清清淡淡啱我口味。我哋揀咗258嘅放題，有四種唔同牛肉和豬肉、雞肉可以食。餐前小食也是order咗立即整嘅上來熱辣辣，唔錯！餐廳環境唔錯，播放日韓音樂。服務也不錯，老細親自忙前忙後，都幾辛苦😂烤肉都幾好吃，肉嘅質素都幾好，特別雞肉，都幾新鮮，烤到啱啱熟，幾juicy。總體來說，對得起呢個價錢，最主要唔限時！可以慢慢食！…查看更多

公司係利奧坊附近，見OpenRice有得買餐飲卷，就試吓新口味啦。環境唔錯幾闊落，lunch menu有定食、丼飯、爐端燒、壽喜燒、湯烏冬同斧飯揀，都算多選擇；跟餐野飲就有普通茶記既咖啡、奶茶、檸茶、檸水、柚子蜜，凍熱都可以，另外仲有汽水同道地既紙包揀。Openrice餐卷優惠，$50買卷可以當$100用，一張單滿$200可以用一張，每次最多用2張，即係最多減到$200。同同事2個人去食，既然用餐卷就叫咗其中最貴既兩個餐。同事揀咗鮑魚蟹肉斧飯，我就叫咗爐端燒食燒肉。無影到同事個餐，但係有一隻兩節手指大既原隻鮑魚連殼同蟹腳；即場用斧焗煮，熱㷫㷫既飯都ok，冬天應該更唔錯。我既烤肉係用爐端燒既爐烤既，跟餐仲有一個沙律、麵豉湯同一大碗飯；肉既份量都ok，一盤牛+一盤豬總共兩盤。埋單用咗一張餐券，補返$89就得啦；計埋買卷既$50，除返人均消費都係$70左右。茶記普通到個餐都$50+，久唔久食一次精品少少既野，都ok啦。食力人人唔同，同事同食量都唔大；食完就好飽既，下晝都無再食零食到收工💁🏻‍♀️…查看更多

求其入咗呢間餐廳，開頭見到係放題冇乜太大嘅期望，但係食得出肉質係有質素，算係選擇唔多，但係質素搭救嘅餐廳。同埋老闆員工服務態度好好，整體價錢合理，環境又好👍🏻會推介俾朋友…查看更多

初次光顧感覺良好，環境清靜，一間有得燒又有得打邊爐的餐廳，感覺好正！食物新鮮且質素不錯，服務員細心招待👍🏻值得推介 今次叫咗牛里肌套餐，薄薄牛肉易入口，不能說是好優質，但性價比高，價錢合理，豚肉超大塊，有入口即溶的感覺，最愛鯛魚，用嚟燒真一流，超好味😋 整體都好抵食👍🏻會再光顧的。 飲品款式唔算很多，但足夠，都是寫紙仔，有人送上的。 點餐後好快送到，沒有漏單情況!重點一提，全日免加一，放題無限時👍🏻呢樣超棒🤭…查看更多

有次無意中發現佢，就試吓啦。 點知佢好抵食 $258 有得任食，同事燒嘢食同shabushabu，野飲仲要任飲。 全日劃一收費又唔駛比加一！食材都好高級，特別係炸午餐肉同鯛魚片真係瘋狂encore清酒放題先$42 ，岩飲酒既真係好抵。因為我地帶埋BB仔去，成日都好驚嘈到人/阻到人。 職員哥哥好好，幫我地安排闊落角落頭位，成日主動黎幫我地收盤、加湯，有無野要幫手咁。 仲比熱水我座熱枝奶奶BB🥹次次我地諗唔到食咩都會去返呢間度食😂…查看更多

今次打邊爐加燒肉嘅體驗有啲意想不到，呢間餐廳環境舒適，枱面乾淨整齊，而且侍應服務態度幾好，仲有得任食任飲（加$48清酒任飲）令我同友人都食慾大增。我哋今次揀咗最平嗰set （$228，全日免+1），嗌咗牛里肌、特選豚肉同鯛魚片。係食材方面，豬肉新鮮嫩滑，油花分佈均勻，我個人覺得口感比牛肉更好。牛肉肥瘦適中，口感爽脆，配上醬汁更添風味。魚片薄切，肉質細嫩，有啲似鯇魚咁爽口，比想像中出色。蔬菜同丸類就基本選擇，不過不失。湯底方面，我哋嗌咗芫荽皮蛋做湯底，清甜可口，冇過多的調味，皮蛋足料又大粒，係芫荽略嫌可以再多啲😆我都忍唔住食咗幾粒皮蛋。服務方面，服務員態度親切，我哋一行3人都係等咗一陣就有位，入座之前佢都好客氣叫我哋等等，話執緊枱，好耐冇試過喺香港食放題有咁好服務態度。上菜速度算快，而且會主動詢問我哋需唔需要加湯，非常貼心。有朋友想飲清酒，但明明成枱3個人，呢間都唔會夾硬收足人頭，都係按杯收費，收我哋2人清酒放題價錢，都幾均真👍🏻總體而言，今次打邊爐嘅體驗非常滿意，食材新鮮，湯底清甜可口，服務周到，絕對值得推薦！不過食材偏健康唔太油膩，如果追求濃味嘅人，可能就唔太適合🤣…查看更多