以前曾经同狗狗路过，有食客啱啱行入去食嘢，同我哋讲：「试下呀，呢度啲嘢好好食！」，「你有咩推介啊？」，「样样都唔错，咖啡好饮」。不过，当时食饱咗，冇试到。周未下午茶时间，好想食蛋糕，同狗狗爸爸经过。虽然餐牌上冇甜品，但照样问下店员，对方向厨房了解后，就话有斑兰巴斯克芝士蛋糕，$30/件。入去坐低后，四围望，发现小小的cafe竟然有自己品牌的咖啡豆，系联乘产品，好认真。餐牌上的咖啡选项几多，有啲仲几特别(斑兰咖啡椰奶拿铁)或者系期间限定(桂花蜜糖鲜奶咖啡)。小店有出售挂耳咖啡($15)同咖啡豆(单份$20/罐装冇写价钱)，见小罐上标示的烘焙日期几新鲜，2025年9月，1.5-2个月前。另外，非咖啡类饮品唔贵，好似朱古力只系$28。不过，我同狗狗爸爸只系口痕，所以，净系单点咗1件蛋糕分享。斑兰巴斯克芝士蛋糕：入口即时有斑兰的清香，虽然食食下，味蕾会习惯咗，斑兰味就冇第一啖咁突出，但呢件蛋糕依然系一份惊喜；蛋糕质感唔错，唔系软心、流心果种，但质地都系偏软滑；蛋糕表面有巴斯克应有的，焗过笼的焦香味，以呢个价格，CP值非常高环境方面，冷气啱啱好，室内摆设都算企理，坐得舒服。小店好似有2只猫店长，一只喺厨房稍稍露面后就匿埋咗，而另一只就喺店面行嚟行去，不过，可能我哋唔系熟客，2只猫咪唔算好亲人。小店非常宠物友善，问准店员后，食客可以带埋狗狗入内用餐，而后期店员仲放咗1只超巨型的雪橇犬入嚟，令我同几个食客追住摸狗狗。服务方面，自助落单、斟水，不过，店员会送餐同提供餐具，意外的系，呢度竟然免加一。见餐牌上有唔少素食选择，打算下次嚟试下正餐同饮品。…查看更多
