近排经过旺角金鸡广场地下有间新派食点心嘅点心到 MIX大排档，见到啲点心都几特色，就入去饮下茶食下点心啦！店内环境整洁干净，装修明亮简约，地方都几阔落，无酒楼咁嘈吵，以及枱同枱之间唔会觉得挤迫，感觉舒服。呢度啲点心即叫即蒸，更设有香港工场，确保食物新鲜。茶芥每位$5，无另收加一。黑蒜螺片炖肉排汤 非常热嘅炖盅，汤入面有好多材料，包括黑蒜、螺片、肉排、淮山、鸡脚、杞子、桂圆和红枣等，浓郁而不油腻嘅炖汤，淡淡黑蒜香气散发出来，十分足料。红枣鸡粥鸡件份量唔少，肉质鲜嫩，有调味嘅鸡肉，粥底带少少嘅红枣香甜味，米香绵滑，鲜味很配搭。晶莹鲜虾饺 虾饺外皮晶莹通透，皮薄喊靓，可选2粒或4粒。虾饺馅料涨满，虾肉都好大只，用料上乘，足料又爽口。凤爪排骨饭一上枱热腾腾嘅凤爪排骨饭，排骨肉质松化，咬落软腍，凤爪调味刚好，质感软软，米饭吸收左酱汁，所有材料混合食好惹味。蚬介鲮鱼球 鲮鱼球炸得金黄香脆，鱼肉新鲜，入面加咗葱粒，味道更香，弹牙爽口，点埋蚬介酱一齐食，好滋味。鲜竹牛肉球 饮茶时经常会拣嘅系牛肉球，都系最受欢迎嘅点心之一。牛肉味道浓厚，马蹄好爽，牛肉球入口好嫩滑，不错。冻柠檬茶及冻柠檬水，两杯柠檬同样清新，口感冰凉，即时解渴。…Read More
