集眾菜館

营业中

休息中

當晚3個人去食，咁坐低後就睇下有咩食，諗左一陣都未知食乜好，咁就叫住碟小炒皇同兩支啤酒先，點知個老闆娘就好無禮貌咁講左句，每個人最低消費要$200，當然我地就唔知有最低消費黎樣野啦，咁我地就話ok啦，其實我地一直都仲睇緊食乜，最後諗到食乜餸，咁就叫侍應落單，頂點知侍應唔會落單，一定係要個老闆娘落，咁叫左個咕嚕肉、魚鰾、叫一隻乳鴿，點知個老闆娘乳鴿一叫要叫兩隻，咁我地就話唔要乳鴿，就落左咕嚕肉、同魚鰾，隔咗一陣老闆娘走過黎講話有人外賣一隻乳鴿，問我地令一隻乳鴿我地叫唔叫，咁好啦要隻乳鴿。到上菜，個小炒皇得D韭菜花、炸芋頭絲，幾隻冇味嘅蝦乾、幾粒腰果，味道真係麻麻。跟住就係個魚鰾，完全一啲味道都冇😞到個咕嚕肉，炸得係脆既，不過就好厚粉漿，正式係粉多肉少，同咬落去有部份D肉係有D怪味😩乳鴿就同其他地方食既就冇乜分別。一路食就一路講，唔會再嚟呢間嘢食，一來冇禮貌有冇服務，我仲以為自己去咗卡拉OK，每個人要最低消費$200。

雖然佢嘅樣子唔係好起眼，但係真係我食過最好味嘅咕嚕肉，無論維持熱度到肉質，調味，炸都唔會好粉好老，真正係民間高手，估唔到一碟咁平凡嘅菜式，都可以做到咁好，真係媲美酒店嘅中菜廳。今次同朋友食，另外好想帶屋企人嚟食添啊。至於其他菜式都不過不失，好有鑊氣，又係抵你咁多人排隊等嘅。食飯嗰日係，星期五晚嘅時間，記得要預早少少去排位，因為要人齊先可以入座，因為其中一朋友未到，俾咗下一組人士入去，我哋等多半個鐘先有人走。

一食就知道佢碟豉油皇鵝腸選用嘅鵝腸質素極高，一來食到有鵝油嘅香味，二來佢個彈性同埋煙韌度，真係好味道。唔好睇呢個鐵板白胡椒煎魚卜嘅賣相麻麻，食落好有驚喜，出面常見嘅魚卜煮法都只係薑蔥，用白胡椒煎真係比例少，而且又真係幾好食。酥炸生蠔用嘅生蠔都幾肥美，而且外面D炸皮都真係夠酥夠鬆化。集眾招牌雞唔肥而且雞味濃，肉質鮮嫩，呢一碟係半隻嘅份量，仲有埋雞膶雞腎雞心雞腸，真係正。籠仔甜梅菜蒸菜芯個重點就係D菜芯要同D甜梅菜一齊食，咁樣先至食到佢嘅精髓。豆酥蒸蟶子都好正，D蟶子剛剛熟所以好鮮嫩，配豆酥就味道濃少少不過都幾夾。金銀蛋菠菜苗都好食，當然比起上面嗰D就會變得普通咗D。

夜媽媽11點幾打算去食個宵夜先至打道回府，於是就去咗呢間小館坐低，叫咗咕嚕肉同埋豉油皇炒麵。佢個豉油皇炒麵好食，炒得夠晒乾身，個火喉掌握得好好，要炒到少少燶先至夠香，但係過咗龍就成碟都唔食得。佢D芽菜、韭黃同芝麻令碟豉油皇炒麵嘅香味提升，另外又唔會好油，大廚嘅出品好掂。咕嚕肉係呢間小館嘅招牌菜，又真係煮得好好味。咕嚕肉青椒黃椒紅椒同埋菠蘿都好食，尤其是佢D菠蘿，食落覺得應該係用新鮮菠蘿，用D材料都有D要求。

鮮菠蘿拔絲咕嚕肉果然係招牌菜，真係好好食，佢能夠做到外脆內軟，唔會太乾身，入面舊豬肉仲留有少少肉汁。另外新鮮菠蘿味道果然不同飯響，成本高湖但係味道好令我非常鍾意。呢間嘅小炒王都做得好，佢唔似出面好多地方咁樣用啲餸頭餸尾加啲韭菜腰果就話係小炒王。我最欣賞佢個小炒王入面有炸脆咗嘅芋頭絲，好食，另外佢個蝦乾又唔會太硬太韌咬唔到。金樹安格斯牛柳粒看似平凡但係味道非常出眾，尤其是係個薯仔，炸香咗再同啲安格斯牛柳粒一齊煮，吸收晒啲牛肉味，好正。三個餸看似平凡但係真係做得非常出色。

🌈這間餐廳位於地理位置方便的太子區，餐廳面積不算太大，桌與桌之間的空間感不大，但衞生情況還好，更表現出香港小炒店的地道感覺。食物方面，最令人眼前一亮的就是熱騰騰的‘’紅燒乳鴿‘’，皮脆肉嫩，更保留到乳鴿的肉汁，配上一杯冰涼的啤酒，更顯出小炒店的風味。另外‘’金薯蜜餞牛柳粒‘’都令人一試難忘，金薯炸得很酥脆，牛柳粒也炒得剛剛好，再配上甜甜的蜜餞醬汁，真的非常好吃，對我來說，比起牛柳粒我更喜歡吃金薯。除此之外，‘’拔絲咕嚕肉‘’也是必叫的菜式之一，本身咕嚕肉的豬肉質素很好，有肉汁，再將炸得香脆的咕嚕肉配上甜甜酸酸的醬汁，可謂香港特色之一的美食！不逐一介紹了，總括而言，其餘的菜式全部都很高水準，是一間力推的小炒店。 

鐵板白胡椒煎魚卜真係好掂，用咗白胡椒再加上鐵板嘅熱力，辟走晒魚卜原本嘅魚鯹味，而且亦令到魚卜的味道大大提升。集眾招牌雞果然唔錯，提升成本選用本地嘉美雞，雞味濃兼脂肪含量偏低，另外雞肉都好滑。豉油皇炒麵炒得夠鑊氣兼且夠乾身，炒到帶少少微燶，芽菜韭黃等配料加埋落去真係幾好食。籠仔甜梅菜蒸菜芯嘅甜梅菜香味被菜芯吸咗，所以食D菜芯嘅時候就可以感受到陣陣嘅甜梅菜味，值得一提嘅係D菜芯好鮮嫩。冰火魷魚用嘅魷魚都幾新鮮，呢味餸都算辣，D青瓜好食。呢隻啤酒好飲，出面好少見。

好難得食到D燒乳鴿唔係落油鑊起勢炸，炸到硬晒仲要油淋淋，呢間小店的燒乳鴿真正做到皮脆肉嫩，新鮮美味，$68一隻真係好抵食。Openrice D食評話呢間店必點波羅咕嚕肉，又真係無講錯，真係好好食，咕嚕肉的肉質新鮮有彈性，淋咗汁之後外面層皮都仲可以保留到個脆度，入面舊豬肉質素都唔錯，唔係因為可以求其炸完再淋返個濃味嘅汁而用D質素差嘅肉。豉椒鵝腸用嘅鵝腸新鮮美味，仲可以食到微微嘅鵝油香味。唔好以為D紅椒黃椒青椒係配菜就忽略咗佢地，D椒炒得又香又入味，非常清爽。黃金豆腐粒D豆腐真係非常滑，呢味餸用黎餸酒真係一流。叫咗四樣野四樣都好好味，老闆娘同D伙記嘅服務都好好，唔係好似某D食評講到咁得人驚woo。

很多外地遊客會問香港人，有什麼食物是香港獨有的或者必食。阿薯覺得港式大牌檔是其中一樣能代表香港的食物，也是很值得推介比更多人認識。📚📚📚港式大牌檔的演變和香港的發展有密不可分的關係。大牌檔最初出現是因為十九世紀，香港經濟發展相當落後，有很多貧苦的低下階層。當時的政府設立小販發牌制度，讓低下階層可以靠着擺賣做些小生意謀生。大牌檔也因而興盛起來，多提供價格低廉的食物，並且種類繁多。後來，香港經濟好了，市民對衞生清潔的要求也高了，街上的大牌檔慢慢被取締了。不過有些選擇了走進室內，這些大牌檔小菜也有了變化，迎合時代的轉變。💁🏻‍♀️💁🏻‍♀️💁🏻‍♀️太子的集眾菜館提供不大牌檔小炒，可以讓我們回味昔日風味。太子的集眾菜館非常受歡迎，當日等了20分鐘才能入內。小小的菜館內坐滿人，很難先有侍應幫忙下單、拿碗筷和結帳等等，也反應出人手不足。說真的，對整晚的用餐體驗有點負面影響。不過，菜館內氣氛很好，熱鬧非常，好有舊日大牌檔的感覺。當晚的鮮菠蘿拔絲咕嚕肉(圖1️⃣)，聽說是集眾的名菜。味道的確不錯，比一般店的更脆卜卜，不會油膩。但阿薯更加欣賞的是黃金豆腐粒(圖2️⃣)，外脆內軟，熱辣辣的，讓人不禁一口接一口地吃下去

呢度嘅小炒真係超水準，超讚﹗大家都覺得呢碟金薯安格斯牛柳粒，D金薯好味過D安格斯牛柳粒，因為D薯仔粒炸脆之後變成金薯，然後落返個汁去煮牛柳粒，D金薯吸收晒牛仔粒嘅味，所以份外正。川椒豬手作為冷盤小食，少少辣幾惹味，餸吓啤酒就最啱，D豬皮好有骨膠原Feel，好正。集眾招牌雞係侍應推介嘅，佢地用嘉美雞，所以隻雞唔肥而且雞味濃，肉質嫩滑，呢度半隻雞仲有雞什，味道唔錯。另一度惹味菜式就係呢一個鐵板啫啫雞什，啫啫聲上枱真係熱辣辣，D配菜如芹菜、蒜頭、蔥頭等，真係好惹味。因為想飲湯，所以就叫咗呢個杏汁白肺湯，D杏汁好香滑，入面除咗豬肺之外仲有雞腳，感覺好滋潤。呢隻德國麥味好好飲，唔常見，麥味香又唔苦，掂。

四個人在太子食晚飯，叫咗3個餸，3個都唔錯。招牌咕嚕肉真係招牌菜，真係好好食，佢D咕嚕肉炸到個皮脆口，入面D豬肉竟然仲幾嫩，仲有肉汁。雖然淋返個甜酸汁上面，不過對個咕嚕肉嘅脆皮又唔會有太大影響，起碼食到仲脆脆地，好掂。因為我自己鍾意食魚卜，所以呢度有梗係叫黎試，佢仲要唔係薑蔥魚卜而係白胡椒煎，鐵板上，保持溫度，令魚卜無咁易醒，另外用白胡椒配魚卜香得黎又無晒D魚醒味，都幾好食。呢個係什菌豆腐煲，D豆腐好滑，清清地幾好食。作為一間小炒店，呢度嘅價錢真係略高，不過以呢個價錢，佢嘅食物質素同埋烹調味道喺出面真係冇乜地方可以做得，當茶餐廳食個晚餐都要$70 ，呢度稱得上物有所值。

我近年食過最差嘅一間餐廳，已經前一晚特登打電話book話要乳鴿，諗住同舊同事聚吓舊見吓面，搵間小菜館食吓嘢。點知呢間餐廳全部嘢都甩皮甩骨咁，我落班嘅時候已經同佢講咗話尋日特登留咗兩隻乳鴿，但都可以等我地食到一半既時候話比我哋知賣哂，而且最離譜嘅係仲想賴返落我哋轉頭，話我哋無落單，明明一早落單嘅時候已經講咗幾次，尋日有留到乳鴿，叫佢同我落單，咁都可以冇咗件事嘅，呢間嘢真係經經典。佢啲人完全係冇溝通，運作又極差，啲侍應又唔醒目，廚房出菜勁慢，啲人講到佢啲咕嚕肉點樣好食，其實真係好普通，我哋真係食到個個都好炆憎，情願去過第二間食過，賣單嘅時候又計多錢，我真係強烈建議啲人唔好幫襯，真係唔值，附近周圍大把嘢食，真係唔使食得咁谷氣！

食物質素強差人意，事頭婆冇禮貌到無話可說🤬朋友睇完食評叫我們來試， 到店大概6：25pm,未坐低事頭婆話要 7：45p.m 還枱， 我地話冇問題， 諗住1個鐘4個字食完應走該都冇問題，反正個地方咁擠迫都唔會坐得耐！ 即刻叫餸，叫完等左半個鐘先出第一碟，係拔絲咕嚕肉，我地隨即叫左4個飯，諗住一邊食一邊等其他餸同飯，點知第一口食個咕嚕肉，居然唔熱的，仲要唔係拔絲的！$138一碟普通到唔普通嘅例牌size 咕嚕肉，D 肉仲要唔多新鮮咁樣， 唔知點解O.R. 會有咁多好評。。。 🤔幾分鐘後先再來第二碟金沙尤魚，又係又咸又唔多新鮮的！ 第三碟金磚豆腐需然都係唔熱的，但味道都還可以 。 一路追緊嗰4個飯，終於喺追左5，6次之後姍姍來遲， 來到都係暖的 🤐等到第4碟鵝腸，結果又係唔熱，仲要又咸又有腥臭味🫣 到第5同第6碟餸到來，都一樣又係唔熱，味道都係一般！ 最後第7＆8碟等到 7：19分都未見影，我地叫老闆娘取消， 因為實在等到飽晒（ 真係以為自己去左巴黎食法國菜！）當時老闆娘聽到反應好嬲，問我地而家係咪想唔要，係就早D 講！ 我話而家咪話緊妳知囉！ 跟住佢好嬲咁走埋來同我講， 妳知

開關後D加拿大親戚返香港探親，同佢地食飯要食中菜，於是就帶佢地黎呢間試一試。佢地個個都話菠蘿咕嚕肉好食，佢嘅咕嚕肉真係做到皮脆肉嫩有彈性，D汁又唔會整到個咕嚕肉淋晒，D菠蘿仲係新鮮菠蘿唔係用罐頭菠蘿，水準之作。蒜蓉粉絲蒸青口蒸得好鮮嫩，啱啱熟所以好Juicy，真係做到鮮味加滋味。黃金豆腐粒有驚喜，入面舊豆腐好滑，係一個非常正嘅小食。蝦乾蒜蓉蒸勝瓜又係好好食，佢D蝦乾都幾大隻，好香蝦乾味。將勝瓜粗鞋部份切走，所以食落去好嫩。樣樣都好食，個個都食得開心。

朋友強烈推介我一定要黎呢間舖頭試吓佢個咕嚕肉，今晚終於黎咗，個咕嚕肉真係無介紹錯，我見基本上差不多枱枱都有叫，堅掂。佢個咕嚕人見人愛嘅地方就係真係做到外面就算落咗汁仍然可以有脆皮感覺，而入面嘅肉又可以保持嫩滑兼帶少少肉汁，師傅功架出晒黎。佢個小炒皇都好正，炒得夠乾身，一上枱已經聞到D韭菜的香味，仲有就係佢D芋頭絲炸到好脆口，而D腰果亦都炒到香晒，好夠鑊氣。我見廚師推介塊板仲有一味白胡椒魚標好似幾正，叫咗，好食好惹味，佢用鐵板上熱辣辣，仲有佢好聰明咁用了白胡椒闢咗D魚鯹味，另外個魚標煎到少少脆面口感唔錯。佢個琥珀合桃都唔錯，餸酒啱晒，老闆娘話係師傅自己整唔係直接交貨黎唔怪得之咁好味啦。