响香港要揾潮州嘢食，其实唔系话太多，一系就比较偏远，我系唔太愿意专登搭车去果啲。今次揾到一间响尖沙咀嘅新派潮汕菜，上网睇过评价唔错，加上上星期食完打冷意犹未尽，所以我地又一家人走去试下。我哋点咗9样菜式，每碟都有惊喜，冇一样嘢可以弹，加上非一般，可以话响香港难得一见嘅好service，真系抵佢响间间餐厅都叫苦连天嘅情况下都爆哂场。椒盐白饭鱼我本身麻麻地食白饭鱼，但食落好松脆，加上好香嘅椒盐味刺激味蕾，连唔钟意白饭鱼嘅我都赞好；玻璃乳鸽平时我系唔食乳鸽，一般都又细只、又冇肉、又鞋，但佢嘅乳鸽反而啖啖肉，仲要烧到皮脆肉嫩，难得令我对乳鸽改观；盐水鹅呢个非常出色，卤水鹅就食得多，盐水鹅就第一次食，佢味道冇卤水咁浓，而且带好香嘅鹅味，呢个可以话系必点，呢个系No. 1推介；卤水拼盘有卤水鹅肠、卤墨鱼同卤豆腐，鹅肠爽脆弹牙，墨鱼好滑一啲都唔韧，最估唔到最下栏嘅豆腐，都可以做到咁滑，一般出面食嘅卤豆腐都系柴柴地，一系就好鞋，呢个亦都系必食；潮式马友鱼鱼系起咗骨，鱼肉好滑，虽然佢比埋普宁酱比我地点，但我觉得唔需要，已经好够味；潮式冻蟹睇佢只蟹唔系好大只咁，但都唔少肉，而且肉质系刚好，冇过火，加上冻食都唔会有腥味，钟意食蟹嘅人，一定唔可以错过；铁板XO酱鱼标鱼扣呢个都系其中一个惊喜，我未食过鱼标系好滑，而且冇一旧会有好似香口胶嘅口感，加上XO酱一齐炒，带少少辣，忍唔住要食多几件；潮式炸蚝饼望落去好以好厚粉，其实系佢炸到好松，粉一啲都唔厚，而且爽脆，加上佢哋都落咗唔少蚝，我每夹一次都会有蚝，唔系得个脆皮，唔似出面食咁，食粉多过食蚝；凉伴鱼皮食到都8899，但意犹未尽想加啲嘢食道啤酒，就问职员有咩好推介，佢就介绍呢款凉伴鱼皮。唔好睇佢冇色咁，估唔到系味道丰富，而且带中辣，食唔到辣嘅人会觉得好辣，佢真系冇介绍错，反而会令人想饮多几杯，呢位店员真系醒目。今次真系冇揾错地方，食物嘅味道完全啱我口味，店舖环境唔错，加上地点够方便，同埋一样服务好，响香港都好少会见到呢种service，佢唔系大陆式果种要恭恭敬敬，而系好似朋友咁，可以一齐倾下计。香港人最舍得食，如果好似呢度咁，就算唔系话太平，食到好食嘅嘢，店员又可以做到朋友咁招待，咁先可以做到有翻头客。最后埋单加埋酒水，人均都系400几，讲真系绝对合理。其实我仲有好嘢都想食，佢嘅菜式都真系几多，特别系我最想食嘅鱼翅捞饭都仲未食，预计8月尾点都要嚟一次，睇下鱼翅捞饭有几咁巴闭。…查看更多
