發記海鮮酒家

营业中

休息中

僻.遠.魚,唔靚,蒸o既時間唔啱.蟹,魷魚,蜆,不過不失.菜,麵,反而新鮮有風味.唔通食餐好味d??簡陋的環境,最是一流.

行完山都未夠5點已落到布袋澳，來個early bird dinner。雖然是一行8人，叫個$1388的12人套餐。因為大家又餓又累，唔想諗。本來想加多個生炒骨，老細竟然話冇......唯有改叫京都骨。套餐包括有：白灼蝦來講是少有的大隻，蝦頭又多膏，蝦肉爽口，食得出肯定不是死蝦。上湯龍蝦(伊底)-雖然是上湯，但帶點芝士味。上時已傳來一陣陣香味，味道恰好，沒有上湯的清淡，又沒有芝士那麼溜。而伊麵吸晒上湯的精華，特別好味。椒鹽鮮魷-香脆熱辣又野味。薑蔥炒蟹-我無食，但老友們的評語就一般。火腩炆油-大鱔外皮夠脆，鱔肉又好入味，味道真是一流，是全晚我至愛。清蒸大石班-好有份量、絕不戲場，蒸煮的時間剛好，魚肉嫩滑。海鮮濃湯-其實是白菜豆腐魚湯，味道較鹹，還有重重的薑味，無何否認是絕對有味精的。另加的京都骨-醋味甚重，豬扒的肉質都ok，起碼唔會有雪味。其實套餐的份量十足，而且沒有偷工減料，交足功課，算是扺食。

一行七人短征龍蝦灣, 越過高山後, 成個人散哂. 姊姊V提議入布袋澳, 海鮮島發記二揀一, 揀了發記.行完山已經兩點幾, 人客不太多, 揀了碼頭位, 望望海, 環境幾好.瀨尿蝦: 6分, 二佰幾蚊兩隻瀨尿蝦, 但蝦肉麻麻地鮮甜, 亦唔係太多肉, 貴了點.咕嚕肉: 4分, 叫的是咕嚕肉, 上碟的是京都肉排, 而碟肉無酸甜的味道, 完全係小時食京都肉排的味道, 但點解要叫咕嚕肉? 豉椒炒蜆: 7分, 蜆肉幾大隻, 用豉椒炒幾好食. 但都幾多齋殼無肉.油墨菜: 6分, 好多油, 油墨菜變成油菜.海鮮濃湯: 5分, 好腥, 但又唔覺濃. 海鮮只有魚得閒出席, 其餘海鮮沒有影蹤. 加上豆腐同菜, 份量唔多夠.沙彊雞腳: 5分, 沙彊汁過鹹. 但沙彊味又好似唔多入到隻雞腳.腐竹白果糖水: 7分, 外賣根記的糖水在發記堂食. 腐竹白果糖水很冰凍, 行完山食好正, 但糖水太杰, 沒有了平時食腐竹白果那份清甜的感覺.在附近行山的話, 都可落發記一試. 特登入布袋澳就似乎唔係咁值.

由寶琳地鐵乘小巴到此，只不過25分鐘車程到了個與世隔絕既天堂，感覺比大澳更遠更寧靜，但事實只是與將軍澳這新市鎮短短路程之間，實在是逃離煩囂既好地方。在星期六中午入黎，沿路風景美不勝收，藍天碧海，未吃已經有股放假既氣氛涼透心。講到食物，一行7人，點了12人的$1380海鮮餐，以下續一品評：白灼蝦：份量多，細細隻，但很鮮甜！龍蝦伊麵：份量多，肉爽又彈牙，麵當然好味！薑蔥炒蟹：雖只是花蟹，但味道調較有水準，吃得津津有味！豉椒聖子：聖子size中等，很爽口及夠味！清蒸大海斑：超嫩滑，大家超讚！沙薑雞：是用浸製的方法做，肉是很滑，但稍欠雞味，而且被其他的海鮮比了下去。海鮮湯：鮮甜，除豆腐、菜和魚外，竟然有東星斑在內。炒飯：十分足料，想食多幾碗，但吃不下了~~總括來說，這套餐菜式份量碟碟又大又多，是很足料的。，而且沒有味精，是十分抵吃的，我們7人吃不完外，還要打包，我相信這份量給10人食是最適合。最後，發記還代售根記糖水，6蚊碗冰冰涼涼的，加上日落美景，真令人讚嘆不已~~

都係因為今日行完山先走過來食午餐。兩點幾到但係都差唔多坐滿人。共14個人叫左個12人餐，有魚、蝦、龍蝦、菜、蟹、抄飯、海鮮湯、椒鹽鮮魷、鹽焗雞。其實d餸真係好好大份，尤其是條魚都重過3斤，我地14個餓人都食唔晒。但係d野食唔係特別好食，不過不失，最係埋單每位140蚊，真係幾抵。真係唔使突登來啦。

而家去布袋澳真係好方便，係寶琳巴士總站就可以坐16號van仔入去，經坑口，全程4,5個字，唔想楂車的可以諗吓。講返間酒家，好有長洲海鮮大牌檔feel，好漁港風味，日頭去可以影埋相，啲海鮮好新鮮，食套餐會平少少，但要人多先有。我地一大班人去，食了灼蝦、椒鹽魷魚、蒜蓉象拔蚌、瀨尿蝦、龍蝦伊、蟹、蒸斑、楊洲炒飯。每位約200元。呢個價錢食咁多款海鮮算係咁啦﹗

兩個人去吃下午茶，點了一個十七兩重的芝士焗龍蝦、兩隻帶子、一瓶啤酒和兩碗糖水。結帳要六百四十四圓，大家評評理吧！

帶住R少入布袋澳，幾驚有大狗咬佢，好左今晚見來見去都係貓。R少追極都唔會跌落水的…6個人約得齊入到去都成8點幾，都好，之前比阿少爺walk過下，拉上補下啦。入番正題，今晚叫左唔係太多野，只係簡簡單單叫了白焯蝦、炒碟蜆、油泡墨魚、瀨尿蝦、鮑魚仔、蒸條班再炒碟菜。後來發現7個送就拿臨加碟炒飯。好食又唔係大好食，比起對上果次，下次都係食番海鮮島。發記價錢係平小小，但wok氣就差D。而且又無墨魚刺身食。搞到蝦頭妹有些小失望。

今晚難得有朋友揸車,結果入左布袋澳食飯.真係估唔到星期日晚8點都仲有咁多人,條私家車龍有成幾百米咁長. 果度共有2間海鮮酒家(另一間叫”海鮮島”),分別搭係2個碼頭之上,認真神乎其技~我地試左:椒鹽賴尿蝦($13蚊兩,叫左18兩) –味道ok,多膏,不過唔算啖啖肉鹽焗雞($78半隻) –d肉剛剛熟,好嫩滑辣酒煮花螺($88 例牌) –大隻多肉, 個辣汁好味, 唔會見到好多辣椒油蒜蓉粉絲蒸扇貝($18隻) -- 特多蒜蓉粉絲, 略嫌有少少乾身清蒸鮑魚仔($9隻) –真係勁正,隻隻都好鮮味楊州炒飯(唔記得) –材料新鮮, 粒粒分明, 水準之作最後仲有食甜品,叫左喳咋同埋蕃薯糖水.埋單$754/4人, 幾抵食兼俾想像中平~

今日清水灣游完水去左布袋澳發記食海鮮,我地8個人叫左個$1380既12人餐,原本唸住散叫但係因為要落去choose海鮮,因為費事唸,所以都係冇.我地初初仲唸住8個人邊食得晒12人餐咁多野,問左個d人可唔可以唔要1-2個餸再平d,咁個結果就當然係唔得la.講到d餸,我覺得都ok,d 蝦都幾鮮甜,d聖子好大隻,幾有咬口,d伊麵底龍蝦個汁都唔知係乜汁,如果係芝士又唔夠濃,又唔係上湯,不過佢d龍蝦好大隻,好多肉,同埋d伊麵好好味,跟住黎左條石班,佢整得唔錯,唔會過老,d魚肉好滑同彈牙,跟住就係個crab,我覺得ok la,因為我都唔知點先叫好味(因為我平時唔食既),跟住仲有個生菜同鹽焗雞,呢兩個都係普普通通la,不過其實隻雞d肉好滑,亦都冇乜肥膏,反而我覺得係佢\點雞d汁唔係幾夠味,唔係咸,最後仲有個湯,就真係都唔錯.雖然我地係8個人食12人餐,但係佢都冇俾少份量我地,我地d餸既份量係同隔離有15-16個人既12餐一樣size,不過唔知係咪我地年青力壯,大家又游完水,所以我地8個人都清晒所有野,一樣都冇剩,連d湯都一碗都冇,最後大家都奉住個肚走,盛惠每人$190

星期日同屋企人行山，專程行到布袋澳食海鮮。可能d人趕住搭小巴走，六點半到都夠已經好多台客食緊。佢d套餐唔算貴，千幾蚊一圍，不過我們四個人唯有散叫。山長水遠來到當然要食海鮮啦，先揀了條花子班及一斤跳螺，條魚肉質好嫩好滑，蒸的時間恰到好處。而跳螺只是白灼，尚算鮮甜。京都骨雖然是普通小菜，味道都有水準，椒絲腐乳通菜同蒜蓉西蘭花，好大碟。我最期待的海膽炒飯，等了好耐，左催右催差不多1個鐘頭後先o黎，果然無等錯，雖然材料只有海膽同飯，不過食落好香好鮮味，仲有唔少海膽，唔怪得係招牌菜。埋單都係540又唔收加一，都算抵食。

你幾時去食呀?我上個月頭去過都無問題.死啦,仲諗住今個星期六去同屋企人食添!

$1680. 我幫襯o左幾次, 開頭都足夠. 但最近這次就是這麼少. 同伙計投訴過依然俾六人份量.

我去過發記幾次都係食餐,但係次次都食到抱住個肚走,你幾時去食架?食幾錢既餐?

叫十二人餐,俾六人分量. 離譜到極. 呼籲各位千萬不要上檔. 本人及多位朋友已發誓永不幫襯. ~~