好耐冇去过火炭，由昔日嘅工业区，到今日部分土地演变成住宅区，但系历史悠久嘅大排档依旧不变，仍然每日制造无限嘅美食。但系呢种特色风味，好快就要结束，政府会收回土地起政府综合大楼，所以趁路经此区，一尝香港特色嘅原风味。我们一行6人叫咗下面9款菜式，每一款都只有呢类嘅大排档，先食到呢种火喉。镬气，唔系好多餐厅都做到，甚至好多大酒楼，都做唔到大排档果种食得出嘅镬气。生滚沙田鸡粥第一次食呢个沙田鸡粥，粥底鲜甜，但感觉唔似系用鸡嚟煲，只系食到鲜味而无鸡味；鸡件好嫩滑，似系后加鸡件落粥度煮，否则个肉质会好「鞋」。份量比我想像中大锅，总体嚟讲系好食，值得一试；金牌烧乳鸽平时唔点食乳鸽嘅我，见到咁靓都忍唔住食咗四份一只，皮脆肉嫩，烧到啱啱好，味道亦都适中，一般烧乳鸽会有偏咸嘅情况，呢度个味道做个平衡做得好好；椒盐豆腐(送)老细见我地叫咁多嘢，就送咗个椒盐豆腐比我哋。我初时以为送嘅只系得几旧，点知系好大碟，炸到金黄色非常之靓，而且系做到皮脆肉嫩，刚强嘅外表，内心竟然如此温柔，就算冇得送叫一碟都值得；豉椒炒蛏子蛏子非常新鲜同巨形，煮得好够镬气，熟度系做到分毫不差，刚刚好，肉质保持鲜嫩，豉椒嘅酱汁加上镬气，令到蛏子进一步提鲜，48蚊一只，我觉得价钱合理，可以话街市买自己煮仲平，但系我冇能力做到咁出色嘅效果；酥炸大肠一向钟意食大肠嘅我，好欣赏佢个大肠炸得脆亦唔太肥，肠内洗得够干净，而且份量够多，多到系食唔哂，始始炸大肠比较腻，好容易会有饱济感；黄金墨鱼咀我一向都麻麻地食墨鱼咀，我唔钟意佢有「骨」，佢呢个黄金墨鱼咀，不单只粒粒都冇骨，而且十分嫩滑，嫩滑得嚟又有少少弹牙，加上极邪恶嘅咸蛋黄外层，完全食唔停口，而且份量之多，就算不停咁食，都好似食极都食唔完咁，呢个真系超正，必食；椒盐白饭鱼炸得好松脆，金黄色炸得够干身，椒盐嘅味道系刚好，平时我少食白饭鱼都食多几旧；豉油皇鹅肠上菜时都有啲愕然，点解会咁深色嘅，好似一堆虫咁有啲惊吓。味道唔错，系我想要嘅味道，冇比佢嘅颜色影响到，咸度系刚刚好，鹅肠好爽脆；西芹炒龙趸球原本个菜式系西兰花炒龙趸球，问咗老细原来可以转第二款菜，我哋拣咗西芹炒龙趸球。西芹我冇食到，净系食龙趸，鱼味浓，亦好嫩滑，呢种味道好耐都冇食过。幸运嘅系可以食到呢份滋味，家下除咗仅存嘅大排档外，都唔太多地方食到呢种香港独有嘅美味，镬气系更加难得。有人会觉得，大排档唔卫生、环境差，可是食物质素同味道，先至系最重要。…查看更多
