聚舊日Part 2，夜晚去食放題，揀了殿大喜屋，之前食過尖沙咀果間都幾正，今次去帝京果間，優惠時段比人霸晒，自選時段都照殺，Book左3位。 20:15-10:15，自選時段任食兩小時。餐廳面積頗大，樓底高有空間，3人坐的位子十分闊落舒適。自助區，落左單之後即輪流出去睇下有咩食，飲品有好多選擇，梅酒、清酒及紅酒都有(但都係偏淡味)，有湯水及糖水果下正。冷盤、熱盤小食種類都多，甜品亦唔少，連靚靚馬卡龍都有，雪糕都有好多款同軟雪糕都有。放題第一盤刺身擺盤一定係最靚，即打卡，刺身多款，要了甜蝦、帶子、金槍魚腩、油甘魚、三文魚及松葉蟹腳，新鮮肥美，當中喜歡三文魚及甜蝦。鱘魚籽醬，預到係咩料但都想試下，鹹鹹地唔太有鮮味，好奇一試。海膽拖羅鱈魚干手卷，賣相吸引，有吞拿魚蓉、海膽及魚籽，餡料十足，味道鹹鮮口感豐富，美味。花菇紅燒鮑魚，賣相吸引，有埋西蘭花作配菜，鮑魚口感彈牙，配合個汁味道濃郁，花菇軟腍。花雕醉鮑魚，食落有少許酒味，但味道較淡，口感較韌。金湯燴花膠，必食，感覺名貴，3人份擺晒係一碗到變左感覺好多，花膠大件厚身，口感爽口彈牙黏稠，少許鮮味，食一件都好飽肚。鮑魚皇帝蟹黃粥，個色水賣相不俗但唔見有蟹蓋(因見隔離枱有)，粥底幾綿味道鮮甜。 皇牌燒乳鴿王，賣相都幾靚仔，皮脆肉嫩又香口。川燒珍寶鮮蠔燒，燒蠔肥美飽滿，口感鮮美又多汁，加上大量的蒜好惹味。 泰式金不煥炒蜆，蜆肉飽滿，香口惹味。油鹽焗奄仔蟹，蟹膏甘香，蟹肉鮮甜，不俗。 酥炸桶蠔，個炸皮大厚蠔太細，食落太油味道一般。殿堂級鐵板鵝肝厚多士，厚身大件，味道甘香油潤，多士香脆。蟲草花烏雞湯，飲下湯水，都幾油。自助區小食。甜品都幾多可愛造型，好多人推介花花馬卡龍，打卡之選，試了玫瑰味，口感酥脆帶少許煙韌，淡淡的玫瑰香味，唔太甜，睇得又食得。柿的糯米糍，外皮軟糯，入餡全是cream太甜。 倉鼠造型的芒果布甸，好可愛。狂食雪糕，Häagen-Dazs冧酒提子、焦糖脆餅及牛奶焦糖和肉桂油條，冧酒提子好味就梗，後者兩款都幾好味，係甜左點。Mövenpick檸檬青檸雪葩，酸酸地清香味道。 食物味道不俗，坐得舒適，服務正常，上菜都算快，愉快的一餐。…查看更多
明明係放題，廚房師傅好驚我哋食唔晒，刺身無一樣係夠數，仲要唔齊款😌其他熟食係咁漏單，都唔知會應唔應該繼續落order 好🤔 驚佢一次過連漏單嘅上晒，到時食唔晒浪費又唔想。搵職員協助，佢叫我哋睇返落order record, 逐樣同佢講邊張單無到，數量幾多😠 我哋要求落一張新單，幫我哋跟就可以，之前漏咗就由佢，佢話唔得，一定要逐張對 👍🏻有性格 有原則 好員工除咗杯裝雪糕係算多款同好味之外，其他食物質素都差，部分熟食好咸，蒜蓉焗生蠔又奇奇怪怪又咸又甜，係明顯糖嘅甜唔係食物本身嘅甜🙄 食咗1個鐘左右，嚟得嗰幾樣嘢食，就催埋單⋯⋯多謝晒
