新富盈川味米線・湯飯

营业中

休息中

呢度係我嘅中學回憶，由中學食到大，好鍾意佢哋嘅湯飯，可以自己揀料，炸醬係必嗌，魚腩片都好新鮮！仲有得揀時令蔬菜，營養均衡～每次嚟到我都會必嗌蕃茄魚頭湯米線，啱晒鍾意噒魚骨嘅人，米線大大碗，食完好滿足。湯底濃郁，充滿鮮甜蕃茄味，酸酸甜甜好開胃。魚頭炸得香脆，外皮焦香，內裡魚肉依然嫩滑無腥味，夠晒新鮮。蕃茄軟爛入味，與湯底融合得恰到好處。米線煙韌順口，吸收湯汁後更添風味。佢嘅小食都唔錯，炸魷魚鬚、墨魚餅、香草雞翼都好好食，雞肉好嫩滑，配上香料十分香口。

新富盈真係食咗10幾年。從前由港島過嚟土瓜灣，一星期最少食一次，係有種上癮嘅感覺。但自從休業後再重開，湯底變了不少。一路都係食開小辣，辣得來香甜順喉，湯面沒有辣椒油的，但現在嘅湯底，小辣嘅湯面都佈滿辣椒油，湯只有辣味，掩蓋了湯本身的味道。試過問老闆可唔可以唔落辣椒油，他說辣就一定有，唔係專登加的。另外他的米線水準不穩定，有時煮得過腍，有時又會太硬。現在都會去食，因他的用料的確係新鮮，但就唔會再專登入去捧場。

個個星期都要出土瓜灣，條食街啲舖頭出名嗰啲都試過晒，開始想試新嘢。見到有食評話老顧客覺得冇以前咁好味，以我睇食評多年嘅經驗話俾我知，應該係理解為”以前超好味”😂(冒險精神嘅野…) *****************叫咗鮮魚片，鯪魚球，豬潤小辣米線，見樣已經好對辦，係港式嘅煮法，味道係舊時嘅味道！！！！(以前好鍾意去富記飲魚腩湯) 魚片係新鮮鯇魚(小心有骨) 鯪魚球好彈牙有陳皮味又夠咸，而家已經好少食到咁好食嘅鯪魚球😍😍😍😍😍豬潤亦都好新鮮，完全超過晒 expectation!! 因為實在太好食，所以第二個禮拜又返去食，今次老公陪我去，佢唔食米線，叫咗肉燥豬扒飯，本身我鬧佢飲湯嘅地方做乜叫碟頭飯，佢一定會後悔，點知連碟頭飯都好好食，唔係三餸飯嗰啲，食得出係即煮，豬扒係炸嘅，肉燥唔係台式係港式魚香茄子飯嗰隻肉碎🥺*******************臨走前同老細講好好食，佢好開心叫我多啲嚟😂 依啲有老細永遠喺舖頭坐鎮嘅老舖真係越嚟越少，執嘅執退休嘅退休，有得食好快啲食了。

同屋企人過嚟呢邊做嘢，見到有一間米線舖裝修幾新淨，所以入嚟試吓。呢隻金湯魚片米線真係不得了！個湯好濃味，超級開胃😍☺個米線勁足料，入面有芽菜啦，青瓜啦，娃娃菜，蘿蔔等等嘅配料。屋企人就食湯飯，湯底似乎真係真材實料，份量都好大碗，價錢抵食👍一定會再來幫襯！

再次食番新富盈，湯底同以前差太遠了、淡面無味的、叫魚腐竟然是街市可買到、一心以為係手打或其他。而且價錢貴左好多。 可能食連鎖的味道會比它還要濃、以前多年顧客的我未必會再光顧。

叫左小辣3餸 鮮魚腩 鯪魚球 豆卜米線（少米線）食物足料份量多 用料好新鮮 飲得出湯底冇落味精 感覺幾原味 冇乜添加可以飲埋湯底 感覺係度食米線 比一般米線店cp值高點左鮮魚腩 加埋落湯底去煮 湯底好鮮甜 魚味好濃好岩鍾意出街食 但又想食得健康無添加嘅人另登點左酸梅湯 都好味同足料大大碗3餸米線 好滿足😋

住左土瓜灣咁多年 最近先知道呢間食店湯底飲得出無味精 唔口喝會飲埋湯底 湯底鮮甜好味食材亦非常新鮮 餸好多夠飽肚老闆好好人 會同食客有傾有講而家一星期幫襯幾次 成為左私人飯堂

喺網上面見到介紹，所以就過嚟試吓佢，果然完全冇失望。🥹🥹🥹湯非常之清甜，我揀咗湯飯，然後再加魚腩，豬膶，鹹蛋。湯飯可以跟菜，有西洋菜，白菜，冬瓜，菜心苗，我就揀咗西洋菜。非常之健康，湯完全冇油，一路食嘅時候，一路聽到老闆同班食客傾偈，原來大部份食客都係舊街坊幫襯咗好多年，有時候，食飯唔係食味道，而係食人情味，特別係喺香港真係買少見少。我仲有嗌咗支杞子菊花茶，飲得出係自家煲，非常之清潤，完全冇死甜嗰種味道，飲得出係足料冇加工👍🏼👍🏼👍🏼一定會再黎幫襯😎😎😎PS….魚腩啲骨好幼細，食嘅時候小心啲😉

第一次食湯飯係N年前嘅太子西記，一食就愛上這種天氣凍或者無咩胃口嘅恩物，我鐘意湯飯分開，米要靚，湯要滾有屋企味道，食材要新鮮，重點一定要有一碟辣椒粒比我加豉油，但這類湯飯店唔算多....新富盈係土瓜灣都算湯飯代表，結業後2年係土瓜灣另一個位重開，家庭式生意，最開心莫過於一班街坊支持者。今次新店唔同左，除左地點裝修外，就係由太子做主導老豆輔助。呢度米飯好食，粒粒分明，唔會太濕或太乾；湯清夠滾，食材新鮮；手打牛肉餅爽彈有牛味有肉汁，西洋菜鮮綠清甜，個人覺得份量較小，而且呢度唔係用辣椒粒而係辣椒油 

土瓜灣街坊必定試過小店是一家人經營吃岀久違了的住家味道必是清甜湯底，清甜無比零味精，自選配料夠多，可選不同菜款、肉類，絕對是繁忙，都是人健康之選。但唯獨小店座位有限，人手短缺，等候時間較久。

很高興知道新富盈重新啟業，今日即刻去試吓！鋪面乾淨闊落，仍然見到老闆打點店內事務，出品有保證。我點了魚腩、牛肉餅及腐皮湯飯，湯飯現在可以選擇辣湯，我叫了小辣，不用加錢的，味道同以前食的一樣，好有親切感！手打牛肉餅維持一貫水準，十分彈牙好吃，魚腩新鮮嫩滑，但係鮮腐皮同之前嘅唔同咗，現在的係炸腐皮，口感比較鬆軟肥膩，沒有以前的腐皮咁實在好吃，希望老闆可以入返之前腐皮的貨，味道相差很遠！下次會繼續嚟幫襯，下次要試米線，米線我都一樣咁喜歡！

聽啲街坊講過新富盈係土瓜灣都係出名，屹立多年，最近見佢係新舖重開，所以想試一試佢地出名的湯飯。套餐包一碗湯，一碗飯+菜，另外自選2款餸菜。最近聖誕食左好多野，所以清清地叫左牛肉蘿蔔湯飯。如果唔鍾意食飯，大家可以簡食米線。清湯夠鮮，牛肉都新鮮有牛味，一啲都唔會柴，蘿蔔清甜無渣，同湯底幾夾。最驚喜係佢畀嘅菜份量都多。男朋友叫左魚腩豬頸肉湯飯。魚腩新鮮無臭腥味，肉質爽口。豬頸肉最有驚喜，不會太肥，食落有肉汁，燒得好惹味😋😋😋😋整體幾好食，第日想搵啲清淡食物可以encore 呢間

結業後兩年重新開返去附近一間細啲嘅舖頭，但一樣光鮮企理。舊老闆仲有喺度幫手，但主要由佢仔仔打理。好多舊客都慕名返黎食，因為鋪位細咗都試過要等。比較可惜係以前做宵夜，依家暫時都收得早。可能因為剛剛開返，食物種類冇以前咁多，但係質素保持到👍🏻湯底超鮮甜，啲餸比足料好抵食。名物牛肉餅、炸墨魚依然有。重開後第一次返黎叫咗個人最愛- 西洋菜、鹹蛋、雞肉湯飯，仲送自家製菊花杞子茶。第二次食咗個辣米線，今日再去補左條蒸魚。香港最好食嘅湯飯同其中一間好食嘅米線🥰🥰

新富盈呢個名對土瓜灣街坊嚟講一定唔陌生，13年嚟喺北帝街轉過3次鋪位，仲曾經一度結業，好開心老闆而家重開，比我食返童年嘅味道😋而家一樣係有米線同湯飯，兩者各自會配芽菜同時菜，記得最初最初仲會有埋腐竹，不過而家物價高漲當然冇辦法做到咁多，但繼續有幾個牌仔比客人揀選今日嘅時菜😛我叫咗兩餸米線、牛肉同豬潤($53)，要小辣，牛肉雖然都係茶餐廳式”疏”過嗰種，不過咁多年都keep住佢某種調味方式，而我就係幾鍾意呢個味道，所以次次都叫呢款餸😆以前最鍾意食嘅八爪魚而家冇咗，就改為試下豬潤，爽口得嚟唔粉，以前屋企人都必定會嗌呢個做餸👍🏻提提大家小辣都幾辣下，而我已經係食得落譚仔大辣嘅人，所以唔好睇少佢啊🤣新開張期間仲送每人一杯酸梅湯，酸酸甜甜好解渴～呢篇食評可以話係好有個人主見，話晒真係由細食到大嘅餐廳，就算一般般都會覺得特別好味，希望大家都可以支持呢間屹立咗咁多年嘅小店🤓

以前中學年代lunch 必食，湯飯/米線一樣咁正。有時收工順車都會去食埋dinner 先返屋企。食材新鮮又大碗。前两年老闆退休，餐廳轉手之後仲執埋。覺得勁可惜。好彩老闆又開返，D回憶返哂泥！湯底味道鮮味十足，無以前咁食得辣，今次揀左小辣，叫左以前食開嘅1. 魚腩，2.手打牛肉餅3. 雞肉，味道無變！一樣咁好味！！😋😋p.s.手工酸梅湯好飲🥤🥤雖然菜單改左，以前食開嘅炸魚餅無左，希望遲d 可以加返入菜單！！