大煲皇小廚

营业中

休息中

大熱天時1行4人打邊爐，店內冷氣夠涼，可能呢排天氣實在太熱，晚市都唔係好多人打邊爐，叫咗刺身同生蝦好鮮味又冇腥味，美國肥牛雪花均勻，本地手切牛新鮮，牛坑腩夠淋，牛肩爽有咬口，牛骨髓一般，手打蝦同埋墨魚滑爽彈，珊瑚蚌同鮮魚片就冇乜特別，水魷爽口，老實講句，樣樣都好新鮮，打咗4個小時邊爐，仲叫咗sake 同啤酒，支裝茶和可樂，樣都好夠凍，一邊食一邊飲冰凍飲品，另外當日所有侍應生，服務態度都好友善，食到捧住個肚走😋😋😋

慶生飯局當然離唔開一班人打邊爐啦，每年都會嚟長沙灣哩間大煲皇開間房，今晚叫咗兩個湯底，蕃茄薯仔牛腩煱$128、另一個係升級魚翅煱$398，魚翅煱職員會先上魚翅湯每人一碗，跟住會加湯打邊爐，但老實講如果唔係有最低消費，我寧願叫兩個最平嘅湯底，因為真係唔係有咩咁特別好味，或者叫個雞煲食都好。未開飯之前，我哋叫咗兩個小食，脆炸魚片頭$68呢個真心推介，佢配左一個我估係佢哋自己整嘅辣醬，相當惹味、另外一個冰鎮辣味魷魚$88，可能我哋送啤酒多，所以呢兩款小食，好快清晒😂，主食我哋叫咗兩碟手切肥牛$328，牛味係好濃，係略嫌切得有啲細塊，影響口感。由於叫咗太多配料不能盡錄，整體感覺普通，如果食到呢個價錢，我覺得仲有好多其他選擇🤗

慶祝朋友生日去烚下烚下 又可以傾耐啲都唔怕 已經係第二次嚟食呢間大煲皇打邊爐點解會encall 因為佢每樣食物都好新鮮 感覺到佢有誠意 三五知己仲可以擺雙拼 可以有唔同款式嘅食物 又唔使嗌咁多分量我哋今次點咗個～花膠魚翅雞湯底 雖然叫只係$198特價湯底 但係湯底好都濃都好好味 雞塊都好嫩滑( 建議一滾起冇耐就食咗雞先) 之後再飲埋個湯底~正必點之選 牛頸脊~ 唔使多形容大家睇下幅相就知啦必點之選 響鈴~ 新鮮炸起嘅響鈴係完全唔同 鬆軟香脆 加埋個酸汁食perfect(但今次個 酸汁稍為多咗啲酒味) 減少啲酒仲正必點之選～ 蝦滑墨魚骨雙拼， 一直就知新鮮 佢真係好彈牙其他食物質素都保持到特別 佢哋嘅服務態度好好 尤其是server我哋嘅金毛姐姐會繼續幫襯

幫襯「大煲皇」已經有8、9年。直至搬到新鋪，繼續支持，自有其獨特之處。新鋪在原店隔兩個鋪位，好易搵。新鋪整體比較寬闊、有「卡位」適合2-4人聚會。洗手間亦比以前整潔。當年鍾意左呢度係因為「天仙配」：一條細活魚刺身加火鍋湯底嘅組合300幾蚊。我亦喺呢度愛上左活魚刺身，分出左游水同冰鮮嘅分別。時移勢易雖然呢個組合已經無左，不過靈魂生猛海鮮刺身依然在。可能疫情關係，入貨較少。今晚點了一份油甘魚、一份象拔蚌、6 隻海蝦刺身。上菜時蝦頭仲郁郁下，證明好生猛。生猛劏出來係唔同滋味。象拔蚌好大份，肉質爽口「shok shok 聲」；油甘魚厚切夠口感。Size does matter。另一個主打，一份「頂級本地手切肥牛」。慣性點了大份，目測大概24、5 片。油脂分佈平均、肉味夠濃。原本細份唔夠食，依家我健身，肥牛只食一件。但係細份只係平幾十蚊，所以點大份打包都好。我自己就轉戰「手切滑牛肉」。健身減肥打邊爐，唔食得咁肥，但係又好想食牛肉，點算？健身頻道大神們教落，點餐牌最平的牛肉就得喇！通常最平即係最瘦。不過瘦唔代表唔好食。餐廳嘅滑牛唔知點正，肉如其名好滑。由於油脂少，肉質的口感更突出，咬落有勁啖啖肉。

第二次去呢度食飯,叫左雞煲同酸菜魚煲,食物好新鮮,尤其推介個響鈴,真真好味,魚皮成呎長,牛肉都好正,另外桶蠔好大隻,食落也很好味道,伙計招呼也週到,不過可能多客,有時叫野飲漏左單,整體上比90分！值得一試！價錢也適中唔貴！

幫襯左好耐，已經係我哋同朋友聚會嘅飯堂。見佢而家換咗新鋪，見未有人開始寫，幫手寫個食評佢哋啲食材真係好新鮮，我最鍾意就係生牛肉刺身，次次去都要食。之前以為佢哋唔做，原來只係換咗間舖，嚇死我，以為以後冇得食。佢哋嘅活魚刺身同象拔蚌都好正，手切肥牛同埋牛頸脊都係一流。基本上冇食過一次係唔好食。樣樣野都好好食仲要唔算貴，食到好飽食晒刺身都係五百零蚊一個人，出邊食一定唔得。除咗食物好食，我覺得佢哋嘅服務都好好，所有侍應阿姐都好好人，有一個阿姐成日笑，好開心咁款，態度又好，所以我哋叫佢做happy姐🤣🤣不過新鋪好似有啲嘈，唔知係咪留底矮咗定點，所以如果人多最好book 房。