鳥山名

講過好多次，呢間喺老婆至愛嘅飯堂之一，因為試過好多間日本料理嘅銀鱈魚，真喺呢度嘅性價比最高。最近，佢晌工作上接咗啲新嘢，仲喺硬嘢嚟，所以，為佢打打氣，專登過嚟食佢心愛嘅銀鱈魚定食，當然，食日本嘢我本身都好啱口味。 環境方面，以前嘅食評都寫過， 不過今次都再寫少少，因為裝修上睇到有少少改動，主要喺近扶手電梯側嗰排卡位，加咗啲「屋頂」，可能喺防範有時扶手電梯嘅人唔小心跌嘢落嚟。整體而言，裝修雅致，地方闊落，卡位就最好坐，今次早嚟，亦被安排坐晌卡位。 食物方面，印象上對比起上次睇落都差唔多，依舊選擇非常之多，由佐酒小肴、沙律、刺身、壽司、卷物、手卷、串燒、爐端燒、炸物、一品理料、鍋物、麵類、飯類、甜品及多款套餐，都一應俱全。 而以日本料理而言，定價亦算相宜，而老婆一早嘅心水就喺銀鱈魚。 此外，仲有一個「理料理長推介」餐牌，據侍應介紹喺屬於季節性特色料理，故此，食材都以時令為賣點。 除搵侍應落單，亦可以以二維碼自行落單，可以慢慢睇，慢慢撳，又減少落錯單嘅機會。 枱上已放有簡單嘅調味料、調味碟，都好別緻，一派和風風格，並送上入口舒服嘅玄米茶。原條島根池魚 $198 晌時令推介中見到呢款刺身，賣$198都值得一試。日本料理一向好注重賣相，原條池魚做刺身，襯埋魚頭及整條魚骨，就做得更加靚仔，加上隻深藍色「魚鱗紋」嘅長碟，襯到絕。整條魚切出多件刺身，每件厚薄均一，魚皮色澤閃亮有光澤，仲鎅晒花，肉身晶瑩帶點淡粉色，食落肉質嫩得嚟帶點點爽口，魚鮮味好突出。  昆布油揚手打烏冬 $76 之前都食過呢度啲烏冬，確喺有水準嘅，今次清清哋揀咗一款只配油豆腐嘅，就算喺一碗普通嘅烏冬，睇得見6片油豆腐都專登擺得好好睇睇，再襯少少木魚碎。碗手打烏冬嘅份量好足，而口感滑溜得嚟喺好有韌勁，不愧為手打，湯頭亦好清香，油豆腐食落就好有豆香之餘，外皮又唔會一陣陣油膩感。 銀鱈魚西京燒定食 $189 老婆食過好幾間日本餐廳嘅銀鱈魚，佢都喺覺得「鳥山名」嘅性價比最高，最得佢歡心，今次嚟都喺為咗碟銀鱈魚。對上一次食喺賣$193，今次嚟反而平咗少少，但份量仍然十足，似乎就無將貨就價。整份定食，除兩大件銀鱈魚，仲包埋沙律、前菜、漬物、味噌湯、珍珠飯、甜品。 重點講番件銀鱈魚，果然保持水準，唔單止燒得外皮焦香，肉質細緻嫩滑，極富油香，絕對喺高質素嘅貨色，一口黏糯嘅珍珠米，一口柔滑嘅銀鱈魚，佢話絕對喺大滿足。  食到啱自己口味嘅嘢，當然會食得開心，再加上食物做得有水準，就更加稱心滿意，而服務方面，招呼唔錯，後生仔居好，但好有禮貌，佢哋會不時為我哋主動添茶。題外話，老婆話日本準備排放核癈水，食完呢餐，魚生類嘅菜式會停食好一段時間先喎，哈哈！…查看更多

大隻仔今次覓食嘅店舖就係💥 鳥山名 💥 朋友今日約咗大隻仔入荃灣食晚飯，餐廳環境清靜，坐得好舒服，好適合三五知己聚餐或者拍拖食飯。餐廳位於愉景新城商場，因為樓底夠高，座位闊落，環境舒適，唔會好嘈吵，係dinning out既好選擇。⋯⋯⋯⋯⋯⋯⋯⋯⋯⋯⋯⋯⋯⋯⋯5⭐️ 超班3⭐️ 一般1⭐️ 差味道 ⭐️⭐️⭐️⭐️抵食 ⭐️⭐️⭐️⭐️服務 ⭐️⭐️⭐️⭐️環境 ⭐️⭐️⭐️⭐️⭐️⋯⋯⋯⋯⋯⋯⋯⋯⋯⋯⋯⋯⋯⋯⋯🔥 長崎小長井真蠔 $220 三隻（另加一服務費）店員推介話係季節性限定，岩岩今日飛機空運到香港，保證新鮮。上網一search 原來「長崎小長井真蠔 」比美「令和之怪物」就即刻諗都冇諗order左三隻。😋😋嚟到生蠔好大隻，好新鮮，超級肥美，生蠔上有柚子啫喱、蔥花增加味道層次。食落口充滿海水味，好creamy，店員真係冇推介錯，生蠔新鮮肥美好好食，食完好想去日本旅行。😂😂🔥 銀鱈魚西京燒定食 $187 （另加一服務費）定食包 3款前菜、日式沙律、麵豉湯、白飯、主食😋 主食 - 銀鱈魚西京燒西京燒醬汁甜甜地好好食，銀鱈魚外皮燒得夠香脆，肉質夠滑有魚油香，冇骨啖啖肉，啱晒怕食魚有好多魚骨嘅大隻仔。😋 3款前菜：銀魚仔 + 海蜇海帶 + 綠茶蕨餅銀魚仔唔乾，仲好濕潤，甜甜地好好食，做前菜送啤酒一流。海蜇海帶味道似日式前菜芝麻八爪魚，少少甜少少辣，好好食。綠茶蕨餅味道正常。😋 日式沙律車厘茄沙律菜配上酸醋汁，好開胃。😋 麵豉湯麵豉湯帶有淡淡鮮魚味。🔥 吉列黑豚豬扒定食 $89 （另加一服務費）定食包 3款前菜、日式沙律、麵豉湯、白飯、主食😋 主食 - 吉列黑豚豬扒第一啖食有少少驚喜，炸豬扒外層炸衣超級薄，外皮好脆，肉質唔乾柴，但如果豬扒可以再肥啲就會超級好食。配上炸豬扒汁酸酸地可以解油膩，亦可點上沙律醬、黃芥辣醬、檸檬汁。🔥 手炒黑糖鮮奶 +$19 （另加一服務費）黑糖鮮奶唔會過甜，鮮奶香滑，黑糖漿好濃郁幾好飲。平時飲黑糖鮮奶多數配珍珠或仙草，大隻仔今日飲呢杯黑糖鮮奶入邊有一條條好似啫喱嘅東西，問店員先知叫黑糖條。…查看更多

老婆生日，一年一度，不過今年屋企有啲小維修工程要搞，所以，套番舊年咁，睇場早場（神探伽利略），再食餐晏晝飯，之後，都仲要返屋企繼續啲維修嘢。俾佢揀食乜，佢都喺揀番「鳥山名」，因為佢話呢度嘅銀鱈魚喺最抵食。咁又喺，求先睇完戲，經過「如心二期」都有間日本菜「鮨樂」，同樣有銀鱈魚定食，價錢平幾十，但就得一嚿銀鱈魚，性價比相對無咁高。 環境就唔多講，因為之前嘅食評都講過好幾次，但假期關係，門口有人等入座，裡面又坐滿客，都幾多人幫襯。而入座時已講明用餐限時一個鐘，所以，流轉快，等位唔會耐，咁食個午餐，一個鐘都OK嘅。 枱上放有簡單嘅調味料，送上入口舒服嘅玄米茶。點菜用二維碼自行落單，如果唔熟悉操作嘅客人，亦可以直接搵店員幫手。小弟就叫咗假日午餐定食，定價相宜少少，又有餐飲送，老婆一心一意點嘅銀鱈魚定食就要向主餐牌埋手，所以，相對會貴啲。 壽司定食配手打烏冬 $134 之前試過佢啲刺身丼、吉列豬扒定食，出咗新一輪消費券今回就食貴少少要個壽司定食，一客有8件，仲配一大碗手打烏冬，並伴有沙律、前菜、茶碗蒸、甜品及餐飲，所以，份量肯定好足。先講講啲沙律、前菜、茶碗蒸、甜品，沙律喺簡單嘅沙律菜伴柚子醋，前菜喺一啲漬物，兩者都叫人開胃；而茶碗蒸好有誠意，唔單止啲蒸蛋好滑，裡面有好多料，包括銀杏、冬菇、鳴門卷、雞肉；甜品則喺一小粒抹茶味蕨餅，餐後一點甜。餐飲有好多選擇，亦可加錢升級，但小弟就只喺要咗百香果紅茶，因為老婆喺百香果忠粉，叫嚟俾佢嘆吓。8貫壽司有三文魚、油甘魚、紋甲魷魚、牡丹蝦、蟹棒、帆立貝、鯖魚（似喺，唔肯定）、螺肉軍艦，幾鍾意飯粒細細，一啖過放晒入口，而飯粒捏得鬆軟，唔死實，不過，睇到啲魚生級數同質素都喺一般般貨色，當中 魷魚、牡丹蝦最好食，最鮮美。 手打烏冬可揀配蟹棒或牛肉，當然喺後者睇落正啲啦，碗手打烏冬嘅份量好足，而口感滑溜得嚟有韌勁，湯頭亦好清香，伴有一大片油豆腐兼唔少牛肉，確喺頗為豐富嘅一份定食！ 銀鱈魚西京燒定食 $193 基本上每次老婆嚟都喺點銀鱈魚，由佢賣$164、$185 ……到依家$193，價錢喺貴咗，但份量仍然好足，出面嘅銀鱈魚定食好少俾到兩大件魚咁多，所以，呢度喺抵食啲。而整份定食，仲包埋沙律、前菜、漬物、味噌湯、珍珠飯、甜品，一樣好豐富。而事後先發覺錯手俾多咗一份茶碗蒸，當喺額外花紅咁啦。餐前食少少沙律，清新一吓味蕾，再飲淡湯，味噌湯頗有麵豉香味，但又唔會太濁；前菜、漬物，都喺啲伴飯嘅好拍檔；而甜品喺一小粒朱古力餅，得好細粒，過過口癮而已。至於件銀鱈魚，果然保持水準，唔單止燒得外皮焦香，肉質細緻嫩滑，極富油香，絕對喺高質素嘅貨色，沾上少少沙律醬，風味更佳，一口黏糯嘅珍珠米，一口柔滑嘅銀鱈魚，大滿足。雖然，今餐無搵啲特別嘢食嚟慶祝，但最緊要喺老婆收貨，佢好滿意份銀鱈魚定食。…查看更多

荃灣愉景新城有間甚有人氣既日式料理居酒屋，閒日晚上同周末經常人頭湧湧，大排長龍。提供菜式種類繁多，基本上係講得出既日式料理，例如時令刺身、海膽、生蠔、日本直送和牛，以至清酒同日式料理定食，呢到都可以搵到，一應俱全。所以吸引左好多熱愛唔同類型日本菜既街坊朋友光顧。.同類型店黎計，呢到價格相對親民性價比高。另外，係到可以搵到各類日本季節直送時令食材，甚有誠意。.餐廳有壽司長季節時令推介餐單，定時提供比較少見既海鮮食材：.🔸宮城獨眼龍真蠔 💲88/隻 / 💲250/3隻叫得獨眼龍確實有番多少本事，成隻手掌咁大既真蠔，蠔肉大隻口感清爽，海水味適中，口感Creamy 蠔味突出。食一隻等於食普通幾隻。.🔸北海道紫海膽壽司 💲68北海道紫海膽係6至9月期間最當造，紫海膽味道十分鮮美，甘中帶甜，但甜味比較清。一口食哂大滿足。.🔸石垣貝刺身 💲80石垣貝都係北海道特產之一，8月係盛產季節，最新鮮肥美。連殼上肉質甘甜，口感厚實，質感味道好似象拔蚌刺身。.🔸銀鱈魚西京燒定食 💲187主食點左一客銀鱈魚定食，定食包括有湯、沙津同三款小食，其中一款係甜品抹茶蕨餅。銀鱈魚以西京味噌醃漬，甜而不膩油脂感滿滿，十分好助飯。.🔸吉列黑豚豬扒手打烏冬 💲97吉列黑豚豬扒質素四平八穩，而手打烏冬口感彈牙有嚼感，係我好喜歡既質感。.🔸牛肉蒜片薄燒 💲95有驚喜既一客小食，薄脆既蒜片配上調味剛好、不甜不膩既牛肉薄燒，看似平凡但確實岩口味。正評有回頭之作。.不專業食評nei.foodie…查看更多

趁假日，同老婆、姨仔三人行，小弟請睇戲，姨仔請食晏晝飯，原因宦喺老婆生日，搵啲節目賀一賀佢。由於出咗荃灣睇戲，所以，食嘢都揀番荃灣，而餐廳由老婆發辦，幾年前食過「鳥山名」，佢好鍾意呢度嘅銀鱈魚，印象深刻，故此，就一於再訪。佢有心水就最好，唔使我諗得咁煩，「鳥山名」，我都覺得喺明智之選！假期關係，都幾多人幫襯，因為佢哋個場大，眼見啲人一般食完就走，尤其午市，唔會磨爛蓆，所以，翻枱都快，唔喺等好耐就有位。同上次一樣，又喺被安排坐晌「外邊」挨住商場用餐區嘅卡位，而啲卡位就寧舍闊落。餐廳內喺唔同位置，均放置唔少富和風嘅擺設、器皿、酒樽……等等，都增加整體日本風情嘅感覺。枱上調味料嘅器皿，以及茶杯，都好別緻，一派和風風格。晌假日，特設有假日定食，款式非常之多，但當中嘅款式其實晌主餐牌都有，但定價更相宜，而且，奉放刺身或餐飲。然而，定食中喺無銀雪魚，所以，老婆就喺番主餐牌中埋手。吉列黑豚豬扒手打烏冬 $92呢個定食都好豐富架，伴有沙律、前菜、茶碗蒸及甜品，刺身或餐飲嘅選項中，要咗刺身，反正有玄米茶。吉列黑豚豬扒賣相就好對辦，炸得非常金黃，色澤均勻，一口咬落去外層甘香鬆脆卻唔油賺，肉質亦軟腍富肉汁，做得具水準。唧啲檸汁，再沾一沾沙律醬，感覺就更清爽。湯烏冬嘅份量好足，而口感滑溜得嚟有韌勁，湯頭亦好清香，伴有一大片油豆腐，實在喺非常豐富嘅定食嚟！三文魚腩海赤蝦芥辣章魚飯 $130對上嗰次就喺試咗海鮮七色丼，今次就無咁貪心，要咗呢個以三文魚腩、海赤蝦、芥辣章魚組合嘅海鮮丼，但跟個烏冬定食有少少唔同，多個味噌湯，刺身或餐飲嘅選項中就要咗杯百香果紅茶，因為成碗都已經喺剌身嘛。3款刺身堆到滿滿，又有光澤，每一款都好好食，三文魚腩口感十分油潤，海赤蝦既大隻，又鮮甜，非常爽彈，而芥辣章魚嘅芥辣味都幾重手，食少少都好攻鼻，帶嚟陣陣刺激感，珍珠飯嘅飯粒都好軟熟，帶點黏糯感。沙律喺簡單嘅沙律菜伴柚子醋，前菜則喺一啲漬物，頗開胃；而茶碗蒸外觀就差咗少少，但裡面有好多料，包括銀杏、冬菇、鳴門卷、雞肉，質感卻又滑溜，甜品則喺簡單嘅抹茶味蕨餅。百香果紅茶就當然唔會用上新鮮百香果啦，都喺以糖漿沖製，但味道都唔差，酸香清爽。銀鱈魚西京燒定食 $185雖然喺主餐牌菜式，但一樣喺定食嚟，包埋沙律、前菜、漬物、味噌湯、珍珠飯、甜品，所以，整份定食嚟講，一樣好豐富。賣相無太多花巧，但勝在份量十足，兩大件銀鱈魚好有睇頭，除咗燒得焦香之外，肉質細緻嫩滑，極富油香，絕對喺高質素嘅貨色，沾上少少沙律醬，風味更佳。小弟就掹車邊食呢餐，總之就多謝晒姨仔。食飽後，再上「宜家」（IKEA）入貨，因為嗰度有唔少雪藏素食嘢，啱晒老婆，次次過到嚟愉景新城，指定動作喺上「宜家」買嘢。…查看更多

同屋企人間唔中去荃灣食飯經過幾次都見幾多人等位找左個平日同屋企人試下估唔到8:00 pm 都咁多人等位裡面佈置好靚 好多日式設計 裝飾仲有個區係比小朋友玩 👨‍👩‍👦‍👦👨‍👩‍👧‍👧適合一家大細一起來🐠銀鱈魚西京燒定食 （$175）有飯 前菜 湯 甜品 漬物 沙律份量十足 🍚🍲🥗鱈魚超滑 醬汁剛剛好 👍🏻👍🏻配埋甜甜沙律醬 超夾甜品係紅豆糕 甜度剛剛好 煙煙韌韌🐟天婦羅三文魚反卷 6 件（$75）裡面天婦羅超脆 新鮮炸起上面有好多脆脆粒粒 配埋辣辣沙律醬 厚厚三文魚 外脆內軟 口感超豐富 🍠南瓜併日本蕃薯天婦羅 （$48）南瓜天婦羅鮮甜 外層薄薄 日本蕃薯略為硬身 個人喜愛軟軟口感👫侍應好主動會加水 主動收走空碟服務態度好好 好有禮貌…查看更多

晌日本（查實小弟去日本嘅次數唔多），啲日本餐廳做得好專，喺拉麵就賣拉麵，喺壽司就賣壽司，喺涮涮鍋就淨喺做涮涮鍋。當然，隨迎合客人需要，有唔少餐廳賣嘅菜式喺大包圍，由壽司、刺身、燒物、炸物……乜都有，「鳥山明」就喺後者，過開嚟Ikea買嘢，順道逛逛愉景新城，當然食埋個午餐先鬆人啦。「鳥山明」晌中庭一角，比較喺被忽略。但環境寬敞，無論卡位，還是一般嘅4人座，都較闊落。而且，餐廳主大堂設計幾摩登，波浪形天花，喺較吸晴嘅裝修。餐廳內喺唔同位置，均放置唔少富和風嘅擺設、器皿、酒樽……等等，都增加整體日本風情嘅感覺。而餐廳「外出」有一部份喺挨住商場嘅用餐區，正正晌扶手電梯旁，唔講淨睇相仲以為邊一家西餐廳喔。睇一轉餐牌，食物選擇非常之多，唔怪得特別多家庭客，可讓大家食到自己心水嘅菜式。由佐酒小肴、沙律、生蠔、刺身、手握壽司、軍艦、卷物、手卷、鍋巴、爐端燒、炸物、天婦羅、一品料理、鍋物、麵、刺身飯、御飯、甜品……到多款套餐，淨喺打類別都咁長，目測心算就肯定過百款嘢食。餐牌底頁寫住佢哋主張不時不食，又根據四季節令去嚴選食材，會唔會加添你嘅信心呢！此外，仲有個嘅假日定食，當中嘅款式晌主餐牌都有，但定價更相宜。不過，老婆鍾情銀雪魚，故佢只有晌主餐牌埋手，小弟就揀假日定食。銀鱈魚西京燒定食 $164成個定食包埋沙律、前菜、漬物、味噌湯、珍珠飯、甜品，所以，捧到嚟一望就讓人覺得好豐富。老婆話件銀鱈魚好正，跟上次晌「福丸水產」所食到嘅不煌多讓，肉質細緻嫩滑，極富油香，一客更喺有兩大件，佢超滿足。而珍珠米飯香有飯味，軟綿而黏糯。題外話，個銀鱈魚定食本身無茶碗蒸，只喺午市忙中有錯擺埋落去當啲假日定食，而漬物轉咗做三片刺身，無啦啦益咗我老婆。海鮮七色丼定食 $135至於個海鮮丼定食，有沙律、前菜、茶碗蒸蛋、味噌湯、甜品，同樣睇落豐富。再者，個海鮮丼色彩繽紛，啲海鮮又夠光澤，未食都興奮。沙律簡單嘅沙律菜加點車厘茄，淋上柚子醋，酸香微甜，食得叫人更開胃。前菜喺啲醬油漬嘅銀魚仔，咬落煙煙韌韌，啲醬油濃香惹味。茶碗蒸蛋啲蛋蒸得恰到好處，口感十分滑溜，一放入口就輕易滑落喉嚨，而內裡仲有鳴門卷、冬菇，底下更有銀杏。味噌湯麵豉味幾香濃，但又唔會太濁，食丼食到一半，再喝一口暖湯，可讓腸胃暖和一點。海鮮七色丼既然叫得七色，當然有7款海鮮啦，餐牌已寫明，童叟無欺，包括北海甜蝦、三文魚、藍鰭吞拿魚、油甘魚、鮮帶子、拖羅、馬糞海膽，不過，由於無拖羅，改俾多件油甘魚，小弟無咩特別偏好，只要夠靚、夠新鮮就無所謂，當然拖羅正過油甘。啲海鮮堆到滿滿，又有光澤，今次就偷懶少少，唔逐樣寫，但簡單而言，刺身處理得宜，入口微涼，每一款嘅鮮甜度都超水準，尤其啲甜蝦、吞拿魚蓉、鮮帶子，個人覺得特別出色，就連三文魚都寧舍油潤，出面有時用啲平價貨，或處理得唔好，既乾又啞色。甜品甜點雖只喺一小粒綠茶蕨餅，算喺過吓口癮，粒蕨餅好軟糯，陣陣綠茶香。簡簡單單叫咗兩款定食，但每款定食都有好多配套菜式，非常豐富。而且，水準不賴，尤其小弟嘅海鮮丼，確喺高質，老婆亦好鍾意佢嘅銀鱈魚，淨喺睇樣，個質素都一目了然。再者，呢度人手足，招呼又好，添茶（玄米茶）手快，喺一次愉快嘅午餐體驗。…查看更多