有口福

因為太太從網上見到呢間川菜店，位於九龍城泰菜重鎮，仲有賣沙巴躉做嘅酸菜魚，經Openrice 訂座20:00時段。開餐當日OT關係未能準時到場，打電話改遲10分鐘到，男店員好禮貌亦冇托手踭嚟到坐低睇menu, 舖仔細細款式算多，女店員幫手落單考記性，我哋就咁嗌半份酸菜魚都識推介招牌沙巴躉，唔加配料盛惠$308。湯底連底料食夠酸夠味，魚肉確實同其他食開酸菜魚有不同，肉質較厚、肉較鮮甜美中不足之處是魚肉煮唔入味，兩者未能融為一體。涼拌魚皮: 同出面食開淨係得麻椒辣味不同。此店魚皮顯然切得較幼細、魚皮質感較煙韌，個汁係酸酸地開胃菜，但麻油似乎落得過咗火位，令到整體有點膩。辣炒萵筍絲: 夠熱夠味，除咗$78有啲貴，真係冇乜嘢好挑剔，三爬兩撥好快食曬。炒米粉: 成餐飯嘅MVP 夠熱夠鑊氣，米粉炒得鬆軟而不算太油膩，料頭受火足夠，啲蛋去到燶燶哋嘅程度更顯得香口。難怪聽到有好幾枱堂食同埋好幾張外賣單，都係有叫炒米粉兩個人都清得晒！記憶點停留在炒米粉，如果有機會再幫襯，會試試其他唔同組合。…查看更多

好朋友早已食過九龍城的「有口福」，特登帶我嚟食酸菜魚。餐廳位置都好易搵，訂咗6:00晚飯時間，已經有客人食緊飯了。我就坐低等食，朋友負責點菜。酸菜魚$188 （少骨）講到明少骨，真係每一口都係嫩滑嘅魚肉，好足料，芽菜吸晒酸菜魚湯，採用粗粉絲而不是木薯粉，更滑。兩個女仔可以食晒成盤，就知道非常美味。辣炒萵筍絲$68萵筍絲每一條切得均勻幼長，味道不太咸，剛剛好，成碟食清光。干扁四季豆$58 好夠獲氣，辣辣地好過癮，又一碟清光。孜然寸骨$108 呢碟好驚喜，用真的孜然，而不是用孜然粉，看得到廚師的認真用心。整餐晚飯都好滿意，價錢合理，性價比高，店員親切友善，與食客有講有笑，香港正需要一間有人情味的小店。下次一定再幫襯，食烤魚。…查看更多

九龍城都好嘢食就係人都知嫁啦，今日就試咗一間出名食酸菜魚嘅有口福。涼菜叫咗一個尖椒皮蛋，本身見份量咁多以為三個人會食唔晒，但係少少辣辣味原來同配皮蛋出奇地夾，結果係其他餸未黎之前，我哋已經將佢一掃而空。佢哋嘅酸菜魚每日新鮮製造，絕對唔會留過夜，而且限量供應，好彩嗰日去得早，唔係分分鐘冇得食。酸菜魚非常之惹味，酸辣適中，只係微辣，魚片非常入味，配菜有酸菜、芽菜等，同埋酸菜魚唔少得嘅水晶粉。食川菜點可以唔試一試水煮，所以一見到個水煮田雞，成枱即刻話想試，水煮魚就食得多，水煮田雞真係唔係成日都有機會食到。可能因為自己都食得辣（三哥可以食到中辣），水煮田雞冇想像中咁辣，田雞通常會喺煲仔飯度見到，水煮又係另一個新嘅玩法，聞到香味已經流晒口水，比平時食到嘅田雞更加juicy最欣賞嘅地方就係佢哋嘅鍋可以自選菜色，師傅會幫你整完一齊煲之後先上菜，比自己火鍋整嘅更加入味。我哋就係水煮田雞加咗鴨血，又係酸菜魚加咗豆腐串，兩種配料個味道都好夾。另外叫咗個辣炒萵筍絲，大鄉里表示其實冇咩食過萵筍，但係見佢吵到出嚟晶瑩剔透，口感清爽，加少少辣吊味之後越食越上癮，之後成晚都停唔到口。成晚都係辣野梗係要有啲凍嘢飲balance下，女士就叫咗加多寶涼茶下下火（怕生暗瘡嘛），男士一於少理，叫咗泰國啤酒，根據佢所講麥味比較重。埋單都只係2百幾一位，超抵食！…查看更多